بۇرىنعى بوسقىن الەمدىك نانسەن سىيلىعىنىڭ لاۋرەاتى اتاندى

 ب ۇ ۇ بوسقىندار ءىسى جونىندەگى جوعارعى كوميسسار باسقارماسى نانسەن اتىنداعى سىيلىقتىڭ 2023 -جىلعى لاۋرەاتى جۋرناليست ءارى بۇرىنعى بوسقىن، ءبىلىم الۋ قۇقىعىن قورعاپ، كەنياداعى بوسقىن بالالارعا 100 مىڭنان استام كىتاپ سىيلاعان ابدۋللاحي ميرە ەكەنىن جاريالادى.

kazinform اگەنتتىگى بۇل تۋرالى ب ۇ ۇ جاڭالىقتار سايتىنا سىلتەمە جاساپ حابارلايدى.

«ابدۋللاحي ميرە - جەر اۋدارىلعان قاۋىمداستىقتاردا الەمدى وزگەرتەتىن يدەيالار تۋىنداي الاتىنىنا ءتىرى دالەل ، - دەدى ب ۇ ۇ- نىڭ بوسقىندار ءىسى جونىندەگى جوعارعى كوميسسارى فيليپپو گراندي.

ابدۋللاحي ميرە سوماليدە دۇنيەگە كەلىپ، كەنياداعى بوسقىندار لاگەرىندە وسكەن. ول ءبىراز ۋاقىت نورۆەگيادا تۇردى، ءبىراق ءوز قاۋىمداستىعىنا قىزمەت ەتۋ نيەتى ونى افريكا قۇرلىعىنا قايتىپ ورالۋعا يتەرمەلەدى. ميرە كەنيادا جۋرناليست بولىپ جۇمىس ىستەپ، وندا Refugee Youth Education Hub ۇيىمىن اشتى. بۇل ۇيىم بوسقىندار لاگەرلەرىندە دەمەۋشىلەر سىيعا تارتقان كىتاپتارعا تولى ءۇش كىتاپحانا اشتى، سونداي- اق وسىندا كوشىرىلگەن ون مىڭداعان بالانىڭ ءبىلىم الۋى ءۇشىن مۇمكىندىكتەردى كەڭەيتتى.

«بۇل-مەنىڭ جەكە جەڭىسىم ەمەس. بۇل مەنىمەن بىرگە جۇمىس ىستەپ جۇرگەن بارلىق ەرىكتىلەردىڭ ورتاق سىيلىعى.. . سونداي- اق بۇل - مەكتەپتەردە ءبىلىم الىپ جۇرگەن بالالاردىڭ سىيلىعى»، - دەدى 36 جاستاعى ميرە.

الەمدىك سىيلىق 13-جەلتوقسان كۇنى جەنيەۆا قالاسىندا بوسقىندار ماسەلەلەرىنە قاتىستى جاھاندىق فورۋم بارىسىندا بەرىلەدى. جۋرناليست ەنن كارري جۇرگىزەتىن شارادا تانىمال مۋزىكا ورىنداۋشىلارى ونەر كورسەتەدى.

بيىل سونداي- اق نانسەن سىيلىعىنىڭ ايماقتىق جەڭىمپازدارى دا مراپاتتالادى، ولاردىڭ اراسىندا: ەليزابەت مورەنو باركو (سولتۇستىك جانە وڭتۇستىك امەريكا): كولۋمبياداعى قارۋلى ىشكى قاقتىعىستاردان زارداپ شەككەن قاۋىمداستىقتار قۇقىعىن قورعاۋشى؛ ازيا ءال- ماشرەكي (تاياۋ شىعىس جانە سولتۇستىك افريكا): يەمەندەگى قاقتىعىستاردان زارداپ شەككەن ەكى ميلليونعا جۋىق ادامعا كومەك كورسەتكەن تۇراقتى دامۋ قورىنىڭ نەگىزىن قالاۋشى جانە ءتوراعاسى؛ ابدۋللا حابيب، ساحات زيا گەرو، ساليم حان جانە شاحيدا ۆين (ازيا- تىنىق مۇحيتى ايماعى): ازاماتتىعى جوق بوسقىنداردىڭ قونىس اۋدارۋى مەن قيىندىقتارىن قۇجاتتايتىن روحيندجا حالقىنىڭ ءتورت وكىلى.

لەنا گروحوۆسكا مەن ۆلاديسلاۆ گروحوۆسكي (ەۋروپا): قوناق ءۇي جەلىسى مەن قايىرىمدىلىق ۇيىمى بوسقىندارعا باسپانا مەن ءبىلىم بەرەتىن پولياك جۇبى.

نانسەن سىيلىعى – ب ۇ ۇ بوسقىندار ءىسى جونىندەگى جوعارعى كوميسسار باسقارماسىنىڭ جىل سايىنعى بوسقىندار قۇقىقتارى سالاسىنداعى جەتىستىكتەر ءۇشىن بەرىلەتىن سىيلىق. ول نورۆەگيالىق پوليارلىق زەرتتەۋشى، ۇلتتار ليگاسىنىڭ بوسقىندار جونىندەگى جوعارعى كوميسسارى جانە نوبەل بەيبىتشىلىك سىيلىعىنىڭ لاۋرەاتى فريتوف نانسەننىڭ قۇرمەتىنە اتالعان.