بەرليندە لاڭكەستىك ارەكەت ۇيىمداستىرماق بولعان حاماس مۇشەلەرى ۇستالدى

  فەدەرالدىق پروكۋراتۋرا دەرەگىنشە، ۇستالعان ادامدار لاڭكەستىك ارەكەت جاساۋ ءۇشىن قارۋ ىزدەپ جۇرگەن.

ءۇش ادام بەرليندە، تاعى بىرەۋى نيدەرلاندتا قولعا ءتۇستى. Kazinform بۇل تۋرالى DW باسىلىمىنا سىلتەمە جاساپ حابارلايدى.

گەرمانيا مەن نيدەرلاندتا لاڭكەستىك ارەكەت جاساۋ ءۇشىن قارۋ ساقتالعان جەر استىنداعى قۇپيا ورىندى ىزدەپ جۇرگەن پالەستينالىق حاماس توبىنىڭ ءتورت مۇشەسى ۇستالدى.

«ۇشەۋى بەرليندە تۇتقىندالسا، تاعى ءبىرى روتتەردامدا قولعا ءتۇستى»، - دەپ حابارلادى بەيسەنبى كۇن كارلسرۋە فەدەرالدىق پروكۋراتۋراسى.

مەكەمەنىڭ حابارلاۋىنشا، قارۋدى بەرلينگە جەتكىزۋ، ەۋروپاداعى يەۆرەي نىساندارىنا شابۋىل جاساي قالعان ۋاقىتقا دايىنداپ وتىرۋ جوسپارلانعان ەكەن.

تورتەۋى دە رەسمي شەتەلدىك لاڭكەستىك ۇيىمعا قاتىسى بار دەپ ايىپتالىپ وتىر. ولاردا ناقتى شابۋىل جوسپارى بولماعان. فەدەرالدىق پروكۋراتۋرا دەرەگىنشە، ولار بىرنەشە جىلدان بەرى حاماس مۇشەسى جانە ۇيىمنىڭ شەتەلدەگى اكسيالارىنا قاتىسىپ، حاماس اسكەري قاناتى باسشىلىعىمەن تىعىز بايلانىستا بولعان.

بەرليندە ۇستالعانداردىڭ ءبىرى - ليۆان تۋماسى ابدەلراحيم ال- ا. حاماس باسشىلىعىنان ەۋروپادا وتكەن جىلدارى جاسالعان قارۋ ساقتالعان جاسىرىن ورىندى ىزدەۋ تۋرالى بۇيرىق العان. ال- ا. , ەگيپەتتىك موحامەد ب. جانە روتتەردامدا ۇستالعان نازيح ر. قازاندا وسى ورىندى تابۋ ءۇشىن بىرنەشە رەت بەرليننەن شىققان. 15-جەلتوقساندا بەرليندە ۇستالعانداردىڭ ۇشەۋى سوت الدىندا جاۋاپ بەرەدى.

دانيا 14-قازان تاڭەرتەڭ انتيتەررورلىق وپەراتسيا اياسىندا نيدەرلاندتا لاڭكەس بولۋى مۇمكىن ادامنىڭ ءبىرى ۇستالعانىن حابارلاعان بولاتىن.