بۇركىتشى قىز ايشولپان قۇسبەگىلىكتەن ق ر چەمپيوناتىنا قاتىسادى

استانا. KAZINFORM - شىعىس قازاقستان وبلىسى وسكەمەن قالاسىندا 2024 -جىلعا ارنالعان قۇسبەگىلىكتەن ەرەسەكتەر اراسىندا باستالعان XVII ق ر چەمپيوناتىنا الەمگە تانىلعان ايگىلى بۇركىتشى قىز ايشولپان نۇرعايىپ قىزى دا قاتىسادى.

ق ر ۇلتتىق سپورت تۇرلەرى فەدەراتسياسى ءمالىم ەتكەندەي، سايىپقىران باپتاعان ساياتشىلار مەن قۇسبەگىلىككە قىزىعاتىن قاۋىم ءۇشىن XVII ق ر چەمپيوناتى وتە تارتىستى وتپەك.

8-اقپاندا باستاۋ العان قۇسبەگىلەر اراسىنداعى ەل بىرىنشىلىگى 12-اقپانعا دەيىن جالعاسپاق.

اتالعان بىرىنشىلىككە يتەلگى، بۇركىت، قارشىعا قۇستارى قاتىسادى. جەڭىمپازدار ارنايى كۋبوك، ديپلوم، مەدالدارمەن جانە ءتۇرلى قارجىلاي سىيلىقتارمەن ماراپاتتالادى.

ايتۋلى دودادا تالاي بىرىنشىلىكتە توپ جارعاندار ءوزارا باق سىناسادى.

ايتا كەتەيىك، بۇل قۇسبەگىلەر سايىسىندا بار الەمدى ءتانتى ەتكەن بۇركىتشى قىز ايشولپان نۇرعايىپ قىزى دا ءوز ونەرىن ورتاعا سالماق. بىرىنشىلىكتىڭ باستى ماقساتتارىنىڭ ءبىرى - عاسىرلاردان بەرى جالعاسىپ كەلە جاتقان اتا ءداستۇردى ۇمىتپاي، جاڭعىرتىپ، جاڭا قىرىنان كورسەتۋ.

ەستەرىڭىزگە سالا كەتەيىك، وسىعان دەيىن الەمگە ايگىلى بۇركىتشى، قانداسىمىز ايشولپاننىڭ وتباسى موڭعوليا ەلىنەن ءبىر جولا اتا-جۇرتى قازاقستانعا قونىس اۋدارىپ، كوشىپ كەلگەنىن جازعان بولاتىنبىز.

 

اۆتور
كۇنسۇلتان وتارباي