بەردەنوۆكە جاسالعان شابۋىل: اكىمدىك وكىلى بولعان ءمان-جايدى تولىعىمەن باياندادى

استانا. KAZINFORM - شىمكەنت اكىمىنىڭ ورىنباسارى سارسەن قۇرانبەك ارىپتەسى رۋسلان بەردەنوۆكە جاسالعان شابۋىلدىڭ ەگجەي-تەگجەيىن ايتتى.

ول 21-ساۋىردە وقيعا بولعان كەزدە شىمكەنت اكىمى، ونىڭ بارلىق ورىنباسارى، اپپارات باسشىلىعى ءوز ورىندارىندا، ياعني قالالىق اكىمشىلىك عيماراتىندا بولعانىن مالىمدەدى.

«جەدەل جاردەم، پوليتسيا شاقىردىق. رۋسلان بەردەنوۆ شۇعىل تۇردە اۋرۋحاناعا جەتكىزىلدى. قىلمىسكەر سول جەردە ۇستالدى. ءبىرىنشى كلينيكادا بەردەنوۆكە وتا جاسالدى، ول ۇزاققا سوزىلدى. قالا اكىمى، ءبىز، ورىنباسارلارى وتا اياقتالعاننان كەيىن عانا اۋرۋحانادان كەتتىك»، - دەدى شىمكەنت قالاسى اكىمىنىڭ ورىنباسارى.

سارسەن قۇرانبەك اكىمدىك پەن باسپا ءسوز قىزمەتى نە ءۇشىن بولعان وقيعاعا ۇزاق ۋاقىت پىكىر بىلدىرمەگەنىن ءتۇسىندىردى.

«سەبەبى قىلمىس بولعان جەردە ءبىزدىڭ وكىلەتتىگىمىز جۇزەگە اسپايدى، ول جەردە پوليتسيا ورگاندارى جۇمىس ىستەيدى. سوندىقتان قىلمىستىق ءىس بويىنشا بارلىق پىكىر پوليتسيانىڭ قۇزىرەتىندە، ال دەنساۋلىعى بويىنشا پىكىر دەنساۋلىق ساقتاۋ سالاسىنىڭ قۇزىرەتىندە. قازىر تەرگەۋ ءجۇرىپ جاتىر. بارلىعى پروكۋراتۋرانىڭ باقىلاۋىندا. سۇراقتارىڭىز بارىن تۇسىنەمىز، ءبىراق ول ادام نەگە قىلمىس جاساعانىنا پىكىر بىلدىرە المايمىز. تەرگەۋ بارىسىنا اسەر ەتپەۋ ءۇشىن ەشقانداي اقپارات بەرە المايمىز. تەرگەۋ اياقتالعاننان كەيىن ءىس سوتقا بەرىلگەن ساتتە پوليتسيا دەپارتامەنتىنەن بارلىق قاجەت اقپاراتتى الا الاسىزدار»، - دەدى شىمكەنت قالاسى اكىمىنىڭ ورىنباسارى بريفينگ بارىسىندا ب ا ق وكىلدەرىنە.

سارسەن قۇرانبەك شابۋىلدىڭ سەبەپتەرى تۋرالى تەكسەرىلمەگەن اقپاراتتى تاراتپاۋعا شاقىردى جانە بۇل ءىس بويىنشا قورىتىندىنى تەك تەرگەۋ بەرە الاتىنىن مالىمدەدى.

«قىلمىسكەر مۇنداي ارەكەتتى نە ءۇشىن جاساعانى تۋرالى ءارتۇرلى قاۋەسەت تاراپ جاتىر. مۇنىڭ ءبارى شىندىققا جاناسپايدى دەپ سانايمىز. قايتالاپ ايتامىن، تەرگەۋ بۇل ماسەلەنىڭ نۇكتەسىن قويادى. ونىڭ پسيحيكالىق جاعدايى ناشار بولۋى مۇمكىن، پسيحوتروپ زاتتاردىڭ اسەرىنەن بولۋى مۇمكىن - ونى ءبىز ايتا المايمىز»، - دەپ ءتۇسىندىردى شىمكەنت قالاسى اكىمىنىڭ ورىنباسارى سارسەن قۇرانبەك.

بەردەنوۆكە جاسالعان شابۋىل

ەسكە سالايىق، 21-ساۋىردە شىمكەنت قالاسى اكىمدىگى عيماراتى ماڭىندا اتىس بولدى. سالدارىنان رۋسلان بەردەنوۆ جاراقات الدى.

پوليتسيا مالىمەتىنشە، كۇدىكتى ۇستالىپ، ۋاقىتشا ۇستاۋ يزولياتورىنا قامالعان، بۇل دەرەك بويىنشا قىلمىستىق ءىس قوزعالعان.

كەيىنىرەك رۋسلان بەردەنوۆتىڭ جاعدايى بەلگىلى بولدى.

بەردەنوۆ تۋرالى نە بەلگىلى؟

ول 1985-جىلى 6-ناۋرىزدا شىمكەنت قالاسىندا دۇنيەگە كەلگەن. 2006-جىلى مەنەدجمەنت ماماندىعى بويىنشا ءال-فارابي اتىنداعى قازاق ۇلتتىق ۋنيۆەرسيتەتىن بىتىرگەن. 2009-جىلى كيمەپ ۋنيۆەرسيتەتىن ىسكەرلىك باسقارۋ ماگيسترى (MBA) دارەجەسىمەن ءبىتىردى.

ەڭبەك جولىن 2005-جىلى «الماتى قۇس» ا ا ق («سەيمار» توبى) كومپانياسىنىڭ بولشەك ساۋدا ديرەكتورى قىزمەتىنەن باستادى.

2007-جىلعى اقپان - 2010-جىلعى شىلدە Procter Gamble كومپانياسىنىڭ باس لوگيستيكالىق ۇيلەستىرۋشىسى.

2010-جىلعى شىلدە - 2012-جىلعى قاراشا Eastcomtrans ج ش س جىلجىمالى قۇرامدى جالداۋ ءبولىمىنىڭ باستىعى.

2012-جىلعى قاراشا - 2018-جىلعى مامىر «اق نيەت» ج ش س باس ديرەكتورى.

2018-جىلعى قاراشا - 2019-جىلعى ءساۋىر «اق نيەت» ج ش س بايقاۋ كەڭەسىنىڭ مۇشەسى.

2019-جىلعى ءساۋىر - 2023-جىلعى ناۋرىز Aq niet Group بايقاۋ كەڭەسى ءتوراعاسىنىڭ ورىنباسارى.

2023-جىلعى 29-ناۋرىزدان باستاپ Respublica پارتياسىنىڭ پارتيالىق ءتىزىمى بويىنشا VIII سايلانعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، قارجى جانە بيۋجەت كوميتەتىنىڭ مۇشەسى.

2023-جىلعى ناۋرىزدان باستاپ VIII سايلانعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتى بولىپ Respublica پارتياسىنىڭ پارتيالىق ءتىزىمى بويىنشا سايلاندى.

بيىل شىمكەنت قالاسى اكىمىنىڭ ورىنباسارى بولىپ تاعايىندالدى.