برازيلياداعى سۋ تاسقىنىنان قازا تاپقاندار سانى 169 عا جەتتى
استانا. KAZINFORM - برازيليادا نوسەر جاۋىن سالدارىنان بولعان سۋ تاسقىنىنان قازا تاپقاندار سانى 169 ادامعا جەتتى، تاعى 56 ادام ءىز-ءتۇزسىز جوعالعاندار تىزىمىندە. بۇل تۋرالى انادولى جازدى.
ءۇش اپتا بۇرىن ەلدىڭ وڭتۇستىگىندەگى ريو-گراندي- دۋ-سۋل شتاتىندا نوسەر جاڭبىر جاۋعان. برازيليا ازاماتتىق قورعانىس اگەنتتىگىنىڭ مالىمەتىنشە، 469 اۋىلدا ىزدەۋ-قۇتقارۋ جۇمىستارى جالعاسىپ جاتىر.
«ءبىرقاتار ەلدى مەكەندە سۋ دەڭگەيى تومەندەپ، سۋ جەلىلەرى قالپىنا كەلتىرىلىپ، حالىق بىرتە-بىرتە اۋىز سۋعا قول جەتكىزىپ جاتىر. 42 تاس جولدى، كوپىردى جانە كوشەلەردى سۋ باسقان، ولاردى قالپىنا كەلتىرۋگە ۋاقىت قاجەت»، - دەلىنگەن حابارلامادا.
ريو- گراندە- دۋ- سۋل شتاتىنىڭ گۋبەرناتورى ەدۋاردو لەيتە 3-مامىردا قۇتقارۋشىلاردىڭ ءالى دە ءبىرقاتار ايماققا جەتە الماي وتىرعانىن ايتتى.
«ءبىز وتە اۋىر جاعدايدى باستان كەشىرىپ جاتىرمىز. بۇل سىني وقيعا ەمەس، مەملەكەت تاريحىنداعى ەڭ جويقىن وقيعا»، - دەدى ول.
لەيتە قايعىلى وقيعانىڭ اۋقىمدىلىعىنا بايلانىستى شتاتتىڭ 180 كۇنگە «تابيعي اپات جاعدايى» جاريالانعانىن جانە ادامداردى ەۆاكۋاتسيالاۋ ءۇشىن ۇلكەن جۇمىستاردىڭ جۇرگىزىلىپ جاتقانىن ايتتى.
ايتا كەتەيىك، بۇعان دەيىن برازيليانىڭ وڭتۇستىگىندەگى كليماتتىق اپاتتان قازا تاپقاندار سانى 151 گە جەتكەنىن حابارلاعان ەدىك.
