برازيلياداعى سۋ تاسقىنىنان 39 ادام قازا تاپتى
استانا. KAZINFORM - برازيليانىڭ وڭتۇستىگىندەگى ريو- گراندي- دۋ- سۋل شتاتىندا سۋ تاسقىنىنان 39 ادام قازا تاپتى. بۇل تۋرالى Reuters اگەنتتىگى حابارلادى.
ەلدىڭ ازاماتتىق قورعانىس دەپارتامەنتى 70 كە جۋىق ادامنىڭ ءىز- ءتۇزسىز جوعالعانىن حابارلادى. تولاسسىز جاۋعان جاڭبىر شتاتتاعى 497 قالانىڭ جارتىسىنان كوبىنە اسەر ەتكەندىكتەن، كەم دەگەندە 24 مىڭ ادام ءۇيىن تاستاپ كەتۋگە ءماجبۇر بولدى.
«بۇل ساندار جاقىن كۇندەرى ايتارلىقتاي وزگەرۋى مۇمكىن. ويتكەنى ءبىز كوبىرەك ايماقتارعا كىرۋ مۇمكىندىگىنە يە بولامىز»، - دەيدى شتات گۋبەرناتورى ەدۋاردو لەيتە.
تاكۋاري وزەنىنىڭ اڭعارىنداعى بارلىق قالا تولىعىمەن سۋ استىندا قالدى. كەيبىر قالالاردا كوشەلەر وزەنگە اينالىپ، جولدار مەن كوپىرلەر قيراپ قالدى. سونداي- اق، سۋ تاسقىنى گيدروەلەكتر تورابىنىڭ ءىشىنارا بۇزىلۋىنا اكەلدى. شتات استاناسى پورتۋ-الەگريدە وزەندەر ارناسىنان اسىپ، سۋ باسقان كوشەلەر قالانىڭ ورتالىق اۋداندارىنا قاتىنايتىن جولداردى جاۋىپ تاستادى.
بۇعان دەيىن برازيليانىڭ وڭتۇستىگىندە تولاسسىز جاۋعان جاڭبىر سالدارىنان ون ادام قازا تاپقانى تۋرالى جازعان ەدىك.
