برازيليا يزرايلدەگى ەلشىسىن شاقىرىپ الدى

  استانا. KAZINFORM - يزرايل پرەزيدەنت لۋيس يناسيو لۋلا دا سيلۆانى «پەرسونا نون گراتا» دەپ جاريالاعاننان كەيىن برازيليا تەل-اۆيۆتەگى ەلشىسىن «كونسۋلتاتسيالار ءۇشىن» كەرى شاقىرىپ الدى، دەپ حابارلايدى انادولى اقپارات اگەنتتىگى.

پرەزيدەنت لۋلا دا سيلۆا يزرايل مالىمدەمەلەرىنەن كەيىن ءوز مينيسترلەرى مەن كەڭەسشىلەرىن يزرايلمەن داعدارىستى تالقىلاۋ ءۇشىن رەسپۋبليكا پرەزيدەنتىنىڭ رەسمي رەزيدەنتسياسىندا «شۇعىل» كەزدەسۋگە شاقىردى. يزرايلدىڭ لۋلا دا سيلۆاعا قاتىستى سوزدەرىنە جاۋاپ رەتىندە برازيليا تەل- اۆيۆتەگى ەلشىسى فرەدەريكو مەيەردى كەڭەسۋ ءۇشىن ەلگە شاقىردى.

پرەزيدەنتتىڭ كەڭەسشىسى سەلسۋ اموريم ءوز مالىمدەمەسىندە ءيزرايلدىڭ لۋلا دا سيلۆاعا قاتىستى سوزدەرىن «ماعىناسىزدىق» دەپ اتادى. برازيليا بيلىگى بۇل ماسەلەگە قاتىستى رەسمي مالىمدەمە جاساماعانىمەن، جەرگىلىكتى ب ا ق ءيزرايلدىڭ برازيلياداعى ەلشىسى دانيەل زونشايننىڭ سىرتقى ىستەر مينيسترلىگىنە شاقىرىلعانىن حابارلادى.

ەسكە سالا كەتسەك، برازيليا پرەزيدەنتى لۋلا دا سيلۆا ءيزرايلدىڭ گازا سەكتورىن باسىپ الۋىن «گەنوتسيد» جانە گازا سەكتورىندا بولىپ جاتقان وقيعالاردى «سوعىس ەمەس، گەنوتسيد» دەپ اتادى. يزرايل پرەمەر- ءمينيسترى بينيامين نەتانياحۋ دا لۋلا دا سيلۆانىڭ سوزدەرىنە قاتىستى «برازيليا قىزىل سىزىقتان ءوتتى» دەپ جاۋاپ بەردى.

بۇدان بۇرىن يزرايل وڭتۇستىك افريكا پرەزيدەنتى سيريل رامافوسانىڭ پالەستينانى قولدايتىن مالىمدەمەلەرىنە بايلانىستى وڭتۇستىك افريكاداعى ەلشىسىن ودان ءارى كونسۋلتاتسيالار ءۇشىن شاقىرتىپ العان بولاتىن.