بۋرابايداعى زاڭسىز جەر تەلىمدەرىنە قاتىستى قانداي شەشىم قابىلداندى — پروكۋراتۋرا جاۋاپ بەردى
استانا. KAZINFORM - اقمولا وبلىستىق پروكۋراتۋراسى «قازاقپارات» اگەنتتىگىنىڭ سۇراۋىنا وراي، بۋراباي اۋدانىنىڭ اكىمدىگى مەن ءماسليحاتى ەلدى مەكەندەردىڭ شەكاراسىن كەڭەيتۋ تۋرالى شەشىم قابىلداپ، بۋراباي كەنتىنىڭ، شۋچينسك قالاسىنىڭ جانە بۋراباي اۋدانىنىڭ جەرگىلىكتى اكىمدەرى ۇلتتىق پارك اۋماعىنان جەر تەلىمدەرىن بەرگەنى انىقتالعانى تۋرالى حابارلادى.
«جەر كودەكسىنىڭ 122-بابىنا جانە „ەرەكشە قورعالاتىن تابيعي اۋماقتار تۋرالى“ زاڭنىڭ 22-بابىنا سايكەس، ەرەكشە جاعدايلاردى قوسپاعاندا (تەك ۇكىمەتتىڭ شەشىمىمەن)، ەرەكشە قورعالاتىن تابيعي اۋماقتاردىڭ جەرلەرىن بەرۋگە نەمەسە تاركىلەۋگە تىيىم سالىنعان. تەكسەرىس 2000 -جىلدان 2023 -جىلعا دەيىن بۋراباي اۋدانىنىڭ اكىمدىگى مەن ءماسليحاتى ەلدى مەكەندەردىڭ شەكاراسىن كەڭەيتۋ تۋرالى شەشىم قابىلداپ، بۋراباي كەنتىنىڭ، شۋچينسك قالاسىنىڭ جانە بۋراباي اۋدانىنىڭ جەرگىلىكتى اكىمدەرى ۇلتتىق پارك اۋماعىنان جەر تەلىمدەرىن بەرگەنىن انىقتادى. زاڭسىز قابىلدانعان شەشىمدەردىڭ كۇشى وبلىس پروكۋراتۋراسىنىڭ قاداعالاۋ اكتىلەرى بويىنشا جويىلدى، ويتكەنى جەردى ەرەكشە قورعالاتىن تابيعي اۋماقتار قورىنان شىعارۋ — ۇكىمەتتىڭ ايرىقشا قۇزىرەتى»، - دەلىنگەن وبلىستىق پروكۋراتۋرانىڭ جاۋابىندا.
وبلىس پروكۋرورىنىڭ ورىنباسارى مارات باقتىبەك ۇلىنىڭ ايتۋىنشا، قازىر ۋاكىلەتتى مەملەكەتتىك ورگاندار ۇلتتىق پارك شەكاراسىن ناقتىلاۋدا.
«سونىمەن بىرگە، ۇلتتىق پارك قۇرىلعانعا دەيىن (2000 جىل) جانە زاڭدى تۇردە بەرىلگەن جەرلەرگە، اتاپ ايتقاندا قولدانىستاعى جەكە تۇرعىن ۇيگە بولىنگەن جەر ۋچاسكەلەرىنە قاتىستى شارالار قازىرگى تاڭدا قابىلدانبايدى. زاڭسىز بەرىلگەن جەرلەردى قايتارۋ جۇمىستارى جەر رەسۋرستارىن باسقارۋ دەپارتامەنتىنىڭ سوتقا تالاپ ارىزدارى نەگىزىندە جۇرگىزىلۋدە. قازىرگى ۋاقىتتا زاڭسىز بەرىلگەن جەر تەلىمدەرىنىڭ كولەمى ناقتىلانۋدا. تەكسەرىس ناتيجەسى بويىنشا ۇلتتىق پارك اۋماعىنان زاڭسىز جەر تەلىمدەرىن بەرگەن ادامدارعا قاتىستى شارالار قابىلدانادى»، - دەلىنگەن ونىڭ جاۋابىندا.
ايتا كەتەيىك، بۇعان دەيىن اقمولا وبلىستىق پروكۋرورى رۋفات قۇتتىقوۆ «بۋراباي» م ۇ ت پ اۋماعىنداعى جەرگىلىكتى حالىق بۇرىننان تۇراتىن جەر تەلىمدەرى قايتارىپ الىنبايتىنىن حابارلاعان بولاتىن.
«قاراپايىم تۇرعىندار 98-جىلدان، 2000-جىلدان بەرى تۇرىپ جاتقان نىسانداردى ءبىز ءسۇرىپ تاستامايتىنىمىزدى، قانداي دا ءبىر تالاپ قويمايتىنىمىزدى اتاپ وتكىم كەلەدى»، - دەگەن بولاتىن رۋفات قۇتتىقوۆ.
