بۋرابايداعى بايكال سوقپاعىنىڭ كۇزگى اسەم كورىنىسى كوز تارتادى
كوكشەتاۋ. KAZINFORM - بۋرابايداعى بايكال سوقپاعى - قازاقستانداعى جاياۋ سەرۋەندەۋگە ارنالعان ەڭ كوركەم جانە تارتىمدى ورىنداردىڭ ءبىرى.
ۇلكەن شاباقتى كولىنىڭ وڭتۇستىك جاعالاۋىنان اينالىپ وتەتىن تاۋ سوقپاعىنىڭ تابيعي سۇلۋلىعىنا جەرگىلىكتى تۇرعىندار دا، تۋريستەر دە بىردەن نازار اۋدارادى.
ونىڭ بايكال سوقپاعى اتالۋىنىڭ وزىندىك ەرەكشەلەگى بار. ياعني، جەرگىلىكتى لاندشافتىڭ بايكال كولىمەن ۇقساستىعىنا بايلانىستى اتالىپ كەتكەن.
كولدىڭ ءمولدىر سۋى، جارتاستى جاعالاۋلارى جانە كەرەمەت قاراعايلى ورماندارى تابيعات اياسىندا دەمالۋشىلارعا جايلىلىق پەن تىنىشتىق اتموسفەراسىن سىيلايدى.
بايكال سوقپاعى - جابايى تابيعاتتىڭ تىنىشتىعى مەن سۇلۋلىعىنان ءلاززات العىسى كەلەتىندەر ءۇشىن تاماشا جول.
كۇز مەزگىلى - ورماندا سەرۋەندەيتىن جىلدىڭ تاماشا ۋاقىتى.
سوقپاقتىڭ ۇزىندىعى ونى ءبىر كۇندە ءجۇرىپ وتۋگە مۇمكىندىك بەرەدى، بۇل ءتىپتى تابيعات اياسىندا دەمالۋدى ەندى ۇيرەنىپ كەلە جاتقان اۋەسقوي ساياحاتشىلار ءۇشىن دە تاپتىرماس ورىن.
ال تاجىريبەلى ساياحاتشىلار ءۇشىن مارشرۋتتى كەڭەيتۋگە جانە كولدەر مەن ونىڭ اينالاسىنداعى تاۋلاردىڭ كەرەمەت كورىنىستەرىن ۇسىناتىن جاقىن شىڭدارعا شىعۋ مۇمكىندىگى بار.
«بۇل باعىت اسىرەسە جاياۋ سەرۋەندەپ دەمالۋشىلاردىڭ ءجيى كەلەتىن ورنى. ويتكەنى ءسىز مۇندا ەڭ ادەمى جەرلەرگە تابانىڭىزدى تيگىزىپ قانا قويماي، سۇلۋ تابيعات اياسىندا دەمالىپ، ساف اۋاسىن جۇتىپ، تىنىشتىقتان ءلاززات الا الاسىز. ءسىزدىڭ تىنىشتىعىڭىزدى تەك جابايى قۇستاردىڭ اسەم ءانى مەن سامال جەل تەربەتكەن اعاش جاپىراقتارىنىڭ سىبدىرى عانا بۇزا الادى. ەگەر ءسىز قالانىڭ كۇيبەڭ تىرلىگىنەن شارشاساڭىز، وڭاشا دەمالعىڭىز كەلسە، سونداي-اق، تابيعاتپەن ءوزارا ۇيلەسىمدىلىكتە بولعىڭىز كەلسە، وندا ءسىز بۋرابايداعى بايكال سوقپاعىنا كەلىڭىز. بۋرابايداعى 12 دەن استام مارشرۋت ءسىزدىڭ تاڭعاجايىپ ساياحاتتارىڭىزعا دايىن. تولىق مالىمەتتى بىزدەن بىلۋگە بولادى»، - دەيدى «بۋراباي دامۋ» ج ش س باسپا ءسوز قىزمەتىنەن.
اۆتور
اسلان وسپانوۆ
