بۋرابايدا ءبىر تۇندە 17 قوي نەگە قىرىلدى؟

استانا.قازاقپارات - اقمولا وبلىسىنىڭ بۋراباي اۋدانىندا مال يەسىن شىعىنعا باتىرعان جۇمباق وقيعا تىركەلدى.

Қойлар
Фото: БҚО полиция департаменті

ۆيشنيەۆوە اۋىلىنىڭ ماڭىنداعى قىستاۋدا بەلگىسىز اڭ ءبىر وتار قويعا اڭ شابۋىل جاساپ، 17 ءسىن ولتىرگەن. تاعى 21 قوي جارالانىپ، 9 باس مال ءىز-ءتۇزسىز جوعالعان. جۇرت جىرتقىشتىڭ قاسقىر بولۋى مۇمكىن ەكەنىن ايتىپ دابىل قاققانىمەن، ازىرگە شابۋىل جاساعان اڭ بەيمالىم. بۇل جاعدايدى جاۋاپتى ماماندار تەكسەرىپ جاتىر،-دەپ حابارلايدى Aikyn.kz پورتالىنىڭ ءتىلشىسى.

وقيعا 10-قاراشادا ۆيشنيەۆوە اۋىلىنىڭ ماڭىنداعى قىستاۋدا بولعان. مال يەسىنىڭ ايتۋىنشا، بۇركىتتى شاتقالىنىڭ ماڭىندا، كارلوۆكا جانە ترامبوۆكا اۋىلدارىنا جاقىن اۋماقتا سوڭعى ۋاقىتتا قاسقىرلار بىرنەشە رەت بايقالعان. سونداي-اق ول وسى ماڭدا جىرتقىشتاردىڭ تۇراقتى مەكەندەيتىن ورىندارى بولۋى مۇمكىن ەكەنىن جەتكىزگەن. الايدا مالعا شابۋىل جاساعان اڭدىڭ قاسقىر ەكەنى ازىرگە دالەلدەنگەن جوق. قازىر وقيعانىڭ ءمان-جايى انىقتالىپ، قويلارعا قانداي اڭ شابۋىل جاساعانى تەكسەرىلىپ جاتىر.

«بۋراباي» مەملەكەتتىك ۇلتتىق تابيعي پاركىنىڭ مالىمەتىنشە، قاتاركول ورمانشىلىعى اۋماعىندا 7 قاسقىر مەكەندەيدى. مونيتورينگ ناتيجەلەرى ولاردىڭ پوپۋلياتسيا سانى تۇراقتى ەكەنىن جانە وسى تابيعي ايماق ءۇشىن بەلگىلەنگەن ەكولوگيالىق رۇقسات ەتىلگەن شەكتەن اسپايتىنىن كورسەتكەن.

ال اقمولا وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسى باسشىسىنىڭ مىندەتىن اتقارۋشى ءدىنالى ايتقوجين اتالعان وقيعاعا قاتىستى قوسىمشا اقپارات سۇراتىلعانىن مالىمدەدى.

قازىرگى ۋاقىتتا جاعدايدى انىقتاۋعا «بۋراباي» ۇلتتىق پاركىنىڭ قىزمەتكەرلەرى مەن بۋراباي اۋدانىنىڭ ۆەتەريناريالىق قىزمەتتەرى تارتىلعان. ماماندار تەكسەرىس ناتيجەلەرىن كۇتىپ وتىر.

بۋراباي اۋدانىنىڭ اكىمدىگى دە بۇل ماسەلەنى باقىلاۋعا العان.

ازىرگە باستى سۇراق قىستاۋداعى قويلارعا ناقتى قانداي اڭ شابۋىل جاساعانى بولىپ وتىر. قاسقىر ما، الدە باسقا جىرتقىش پا؟ مامانداردىڭ تەكسەرۋ قورىتىندىسى وسى ساۋالعا جاۋاپ بەرۋگە ءتيىس.

ءبىر تۇندە ونداعان مالىنان ايىرىلعان شارۋانىڭ شىعىنى ءوز الدىنا، ەندى جۇرتشىلىقتى جىرتقىشتاردىڭ ەلدى مەكەندەرگە جاقىنداۋى مۇمكىن دەگەن قاۋىپ تە الاڭداتىپ وتىر. سوندىقتان تەكسەرۋ ناتيجەسى مال يەسى ءۇشىن عانا ەمەس، ماڭايداعى اۋىل تۇرعىندارى ءۇشىن دە اسا ماڭىزدى.

ابزال الپىسباي ۇلى، اقمولا وبلىسى