بۋراباي قىسىنىڭ كەرەمەت كورىنىستەرى - فوتورەپ

Бурабай
Фото: «Бурабай даму» ЖШС баспасөз қызметі

بۋراباي. KAZINFORM - اسەم تابيعاتىمەن «قازاقستاننىڭ شۆەيتسارياسى» اتانىپ كەتكەن بۋراباي كۋرورتىندا جىلدىڭ قاي مەزگىلىندە دە دەمالىستى قىزىقتى وتكىزۋگە بولادى. قازىرگى قىس ماۋسىمىندا ساياحاتشىلاردى قانداي قىزىقتار كۇتەتىنى تۋرالى ءتىلىشى ماتەريالىندا.

بۋرابايدا قىس قارلى، ءارى ايازدى كەلەدى. ءتىپتى، قاڭتار ايىنىڭ كەيبىر كۇندەرى اۋا تەمپەراتۋراسى مينۋس 40 گرادۋستان تومەن ءتۇسۋى مۇمكىن. دەگەنمەن، كۋرورتتى وڭىردە اۋا رايىنىڭ قولايلى كۇندەرى تاماشا قىسقى ەكسكۋرسيالار ۇيىمداستىرۋعا بولادى.

ماسەلەن، «بۋراباي - قازاقستاننىڭ ءىنجۋ-مارجانى» دەپ اتالاتىن ەكسكۋرسيا حان اسۋىنىڭ شىڭى سياقتى جەرلەرگە بارۋدى قامتيدى. بۇل - تاۋلارعا تاڭعاجايىپ پانوراما اشىلاتىن باقىلاۋ الاڭى. ول جەردەن كورىنەتىن جەكەباتىر، بۋراباي، كوكشەتاۋ تاۋلارىنىڭ كورىنىسى بىردەن باۋراپ الاتىنى ءسوزسىز.

Бурабай
Фото: «Бурабай даму» ЖШС баспасөз қызметі

كوكشەتاۋ تاۋىنداعى ابىلاي حان الاڭىندا ءسىزدى ءۇش-قىز، وقجەتپەس تاۋلارى قارسى الادى. ولاردىڭ ءارقايسىسى تۋرالى قازاق حالقىنىڭ تاريحى مەن وزىندىك ەرەكشەلىگىن بەينەلەيتىن تاڭعاجايىپ اڭىزدار جيناقتالعان. ساياحاتشىلار ابىلاي حاننىڭ تاعىن تاماشالاپ، سۋرەتكە ءتۇسىپ، تىلەك تىلەيدى.

كەلەسى نۇكتە - كوگىلىر شىعاناق. ول اۋليەكولدىڭ (بۋراباي كولى) سول جاق جاعالاۋىندا، كوكشەتاۋ جانە تەمىرتاۋ سىلەمدەرىنىڭ ورتاسىندا ورنالاسقان. شىعاناقتىڭ ءدال ورتاسىندا - ايگىلى جۇمباقتاس جارتاسى كوز تارتادى. ەگەر بۋرابايدان ابىلاي حان الاڭىنا قاراي، قايىق ستانساسىنىڭ جانىنان ءجۇرىپ كەلە جاتساڭىز، ول شاشى جەلبىرەگەن جاس سۇلۋ قىزعا ۇقسايدى، ءارى قاراي باياۋ جۇرە بەرسەڭىز، ادەمى قىز بەينەسى كارى كەمپىرگە اينالا بەرەدى، ال وقجەتپەس شيپاجايى جاعىنان قاراساڭىز، سفينكستىڭ بەينەسىن كورۋگە بولادى.

Бурабай
Фото: «Бурабай даму» ЖШС баспасөз қызметі

بولەكتاۋ - بۋرابايدىڭ بويىندا ورنالاسقان تابيعي شولۋ الاڭى. 147 مەتر بيىكتىكتەن كوگىلدىر شىعاناق، جۇمباقتاس جارتاسى مەن وقجەتپەس تاۋى، بۋراباي جانە ۇلكەن شاباقتى كولدەرى سياقتى، وسى ءوڭىردىڭ باستى كورنەكتى ورىندارىنا كەرەمەت كورىنىستەر اشىلادى.

Бурабай
Фото: «Бурабай даму» ЖШС баспасөз қызметі

يمانايەۆ اعىنىندا تاۋ سۋىنىڭ سىلدىر اۋەنىن ەستىپ، تازا اۋا مەن بۋرابايدىڭ سوزبەن جەتكىزگىسىز سۇلۋلىعىنان ءلاززات الۋعا بولادى.

Бурабай
Фото: «Бурабай даму» ЖШС баспасөз қызметі

سونداي-اق، تۋريستەر توپ بولىپ، ءبىر كۇندىك ساياحات جاساي الادى. وندا بۋراباي كۋرورتىنىڭ اسەم ورىندارى، سونداي-اق، مارال شارۋاشىلىعىنا ەكسكۋرسيا قاراستىرىلعان.

بۋرابايعا ساياحات تەك فيزيكالىق قانا ەمەس، پسيحولوگيالىق شارشاۋدى دا جەڭىلدەتۋگە، سونىمەن قاتار ەرەكشە قىسقى ءوازيستىڭ كەرەمەت كورىنىستەرىن تاماشالاۋعا مۇمكىندىك بەرەدى.

«بۋراباي-دامۋ» جشس جىل بويىنا تۋريستەر ءۇشىن بۋراباي كۋرورتىنداعى نىساندارعا قىزىقتى ءارى تارتىمدى ەكسكۋرسيا ۇيىمداستىرادى.

سوڭعى جاڭالىقتار