بۋراباي ۇلتتىق پاركىندە ەكى جىلدا 1 ميلليون ءتۇپ قايىڭ مەن قاراعاي ەگىلگەن

Бурабай
Фото: Фото: Telegram-канал Управляющего делами Президента РК А. Дадебаева

بۇگىن، ياعني قازان ايىنىڭ ءۇشىنشى جەكسەنبىسىندە ەلىمىزدە ورمان شارۋاشىلىعى قىزمەتكەرلەرى كۇنى اتالىپ وتەدى، دەپ حابارلايدى Kazinform.

پرەزيدەنت ءىس باسقارۋشىسى ايبەك دادەبايەۆ باسقارماعا قاراستى «بۋراباي» ۇلتتىق پاركىنىڭ ۇجىمىن وسىناۋ كاسىبي مەرەكەمەن قۇتتىقتادى.

«حالقىمىزدا ءبىر تال كەسسەڭ، ون تال ەك“ دەگەن دانالىق قاعيدا بار. جايقالعان ورمان — ەلىمىزدىڭ ەن بايلىعى، بولاشاق ۇرپاققا قالدىرار اماناتىمىز. مەملەكەت باسشىسى قاسىم- جومارت توقايەۆتىڭ ءوزى ورماندى القاپتاردىڭ اۋماعىن كەڭەيتۋگە تىكەلەي ءمان بەرىپ وتىر. وسى ورايدا „بۋراباي“ ۇلتتىق ساياباعىنىڭ ەڭبەككەرلەرى وزدەرىنە جۇكتەلگەن ماڭىزدى مىندەتتى ابىرويمەن اتقارىپ، جاسىل جەلەك جامىلعان جەرلەردىڭ ۇلعايۋىنا ەلەۋلى ۇلەس قوسىپ كەلە جاتقانىن اتاپ وتكىم كەلەدى. 130 مىڭ گەكتارعا جۋىق القاپ پەن ونداعى اڭ- قۇستاردى تابيعي اپاتتاردان، ءتىلسىز جاۋدان كۇزەتۋ وڭاي ەمەس. بۇل كاسىبي بىلىكتىلىكپەن قاتار، ماماندىققا دەگەن ادالدىقتى، شىنايى جاناشىرلىقتى تالاپ ەتەدى»، - دەپ اتاپ ءوتتى ايبەك دادەبايەۆ Telegram پاراقشاسىندا.

ونىڭ ايتۋىنشا، «بۋراباي» ۇلتتىق پاركىنىڭ ورمانشىلارى ءار جىل سايىن ورتا ەسەپپەن 65 گەكتار اۋماققا اعاش وتىرعىزادى.

كەيىنگى 2 جىلدا 1 ميلليون تۇپتەن استام قايىڭ مەن قاراعاي كوشەتى ەگىلگەن.

«ارىپتەستەرىمىزدىڭ قارقىندى ەڭبەگى مەن توككەن تەرىنىڭ ارقاسىندا ورمان اۋماعى كەڭەيىپ، جان- جانۋارلار دۇنيەسى بايىپ كەلەدى. ۇلتتىق پارك قىزمەتكەرلەرى بىرنەشە جىلدان بەرى Smart Burabay جاڭاشىل جۇيەسىن پايدالانىپ، ورمان ءورتىن دەر كەزىندە اۋىزدىقتاۋدى مەڭگەردى. اڭ- قۇستاردىڭ ساناعىن جۇرگىزۋ جانە كوبەيۋىنە جاعداي جاساۋ، قورشاعان ورتاعا ءقاۋىپ توندىرگەن قاسكويلەردى قۇرىقتاۋ سىندى قات- قابات جۇمىستار جۇيەلى تۇردە جولعا قويىلدى. كوكشە ءوڭىرىنىڭ جاۋھارى سانالاتىن قورىقتى كوزدىڭ قاراشىعىنداي قورعاپ جۇرگەن ەسەلى ەڭبەكتەرىڭىز ءۇشىن بارشاڭىزعا شىنايى ريزاشىلىعىمدى بىلدىرەمىن. سىزدەرگە قاجىماس كۇش- قۋات، شاڭىراقتارىڭىزعا قۇت- بەرەكە مەن باق- داۋلەت تىلەيمىن. تالاي ءان- جىرعا، اڭىزعا ارقاۋ بولعان كورىكتى كوكشەنىڭ جايقالعان ورمان- توعايىن، جان- جانۋارلارىن ساقتاۋ جولىنداعى ەرەن ەڭبەكتەرىڭىز جەمىستى بولىپ، تولاعاي تابىسقا جەتە بەرىڭىزدەر»، - دەپ تۇيىندەدى پرەزيدەنت ءىس باسقارۋشىسى.

سوڭعى جاڭالىقتار