بۋراباي كۋرورتى تۋريستەردى نەسىمەن تارتادى

استانا. KAZINFORM - بۋراباي دەگەندە ويعا ساف تازا اۋا، قىلقان جاپىراقتى ورمان مەن كوگىلدىر كولدەر ورالادى. قازاقستاننىڭ ءىنجۋ-مارجانى سانالاتىن كۋرورت تاعى نەسىمەن تارتىمدى؟

بۋرا
Фото: «Бурабай Даму» ЖШС

- 2024-جىلدىڭ قورىتىندىسىن شىعارا وتىرىپ، بۋراباي كۋرورتىندا ينفراقۇرىلىمدى دامىتۋ مەن سەرۆيستى جاقسارتۋعا باعىتتالعان ماڭىزدى جوبالاردىڭ ءساتتى ىسكە اسىرىلعانىن اتاپ وتۋگە بولادى. بۇل جەتىستىكتەر ونىڭ زاماناۋي تۋريستىك ورتالىق رەتىندەگى مارتەبەسىن نىعايتۋعا مۇمكىندىك بەردى، - دەيدى «بۋراباي دامۋ» ج ش س وكىلدەرى.

سەرىكتەستىك مالىمەتتەرىنە سايكەس، وتكەن جىلى ءبىرقاتار ءىس-شارا اتقارىلعان.

«PIKEMAN 2024» جارىسى

20-شىلدەدە 3-شاقىرىمدىق سۋدا ءجۇزۋ جارىسىنا 300 دەن استام اۋەسقوي قاتىستى. بۇل شارا سپورتشىلار مەن كورەرمەندەردىڭ نازارىن اۋدارىپ، سۋداعى بەلسەندى دەمالىستى تانىمال ەتتى.

مۋلتيمەديالىق ينتەراكتيۆتى كەشەن جاڭارتىلدى

24-شىلدەدە ۆيرتۋالدى جانە تولىقتىرىلعان شىنايىلىق تەحنولوگيالارىن پايدالاناتىن كەشەننىڭ اشىلۋى ءوتتى. التى ايدىڭ ىشىندە كەشەندى 7466 دان استام ادام، ونىڭ ىشىندە الەۋمەتتىك وسال توپتاعى 2 مىڭ قوناق تاماشالادى.

«AQBURA BAY TRAIL-4» جۇگىرۋ سايىسى

3-تامىزدا 11 ەلدەن كەلگەن 1200 جۇگىرۋشىنىڭ قاتىسۋىمەن حالىقارالىق جۇگىرۋ سايىسى ءوتتى. قاتىسۋشىلار «بۋراباي» ۇلتتىق پاركىنىڭ كورىكتى جەرلەرىن قامتيتىن مارشرۋتتى باعىندىردى.

قىرعىز ەلىنەن جۋرناليستەر كەلدى

12-13-قازاندا قىرعىزستاننان كەلگەن 40 جۋرناليسكە ارنالعان تانىستىرۋ تۋرى ۇيىمداستىرىلدى. تۋر بارىسىندا «ابىلاي حان الاڭى»، «كوك شىعاناق» جانە مارال شارۋاشىلىعى سىندى ايماقتىڭ نەگىزگى نىساندارى كورسەتىلدى.

شۋچينسك قالاسىنداعى مۇز قالاشىعى

قىسقى ماۋسىمعا وراي مۇز قالاشىعى دايىندالىپ، مۇندا كونكي جانە تيۋبينگ جالعا بەرۋ قىزمەتتەرى، سونداي-اق دەمالۋشىلارعا ارنالعان فاستفۋد ايماقتارى ۇسىنىلدى.

قىسقى ماۋسىمنىڭ اشىلۋى جانە BurabayLand

14-جەلتوقساندا قىسقى ماۋسىم سالتاناتتى تۇردە اشىلىپ، جاڭا BurabayLand ويىن-ساۋىق نىسانى تانىستىرىلدى. 700 دەن استام قوناق مەرەكەلىك باعدارلاما مەن وت- شاشۋ شوۋىنا تاماشالاپ، جاڭاجىلدىق ءبي كەشىنە قاتىستى.

ايماق تۋريزمىنە اسەرى

- بارلىق ءىس-شارا «بۋراباي دامۋ» ج ش س- ءنىڭ قولداۋىمەن جۇزەگە اسىرىلدى. بۇل باستامالار بۋراباي كۋرورتىنىڭ زاماناۋي تۋريستىك باعىت رەتىندەگى مارتەبەسىن نىعايتتى، - دەيدى سەرىكتەستىك ماماندارى.

ايتا كەتسەك، بىلتىر وتكىزىلگەن ءىس-شارالاردىڭ مەديالىق قامتىلۋى 5 ميلليوننان استام ادامدى قامتىدى. ينفراقۇرىلىمدى دامىتۋ تۋريستەردىڭ بارلىق ساناتى - وتباسىلار، جاستار جانە شەتەلدىكتەر ءۇشىن دەمالىستى جايلى ەتۋگە باعىتتالعان.

سوڭعى جاڭالىقتار