بۋراباي جارتاستارىنداعى شيماي-شاتپاق جازۋ ءوشىرىلىپ جاتىر

жартастағы жазу
Фото:

استانا. KAZINFORM - «بۋراباي» مەملەكەتتىك ۇلتتىق تابيعي پاركىنىڭ ۇجىمى ۆاندالداردىڭ جارتاستاردا قالدىرعان جازۋلارى مەن سۋرەتتەرىن تازارتۋدى باستادى.

«قازىرگى تاڭدا بۋراباي كولىنىڭ جاعاسىنداعى بارلىق جارتاستاردا، سونداي-اق جۇمباقتاستا كەلۋشىلەردىڭ «قولتاڭباسى» قالعان. بوياۋلاردىڭ كوبى بىرنەشە قاباتتان تۇرادى، قالىڭدىعى 1 سانتيمەترگە دەيىن جەتەدى، ءوشىرۋ قيىن. ساراپشىلاردىڭ پىكىرىنشە، تاۋ-تاستاردى تولىق تازالاپ شىعۋعا ءبىر جىل ۋاقىت كەتەدى دەيدى. جارتاستارعا جازۋ جازىپ، گراففيتي سالۋ بۇل ناعىز ۆانداليزم ەكەنىن ءتۇسىندىرۋ كەرەك. ۆاندالداردىڭ ارەكەتى ۇلتتىق پاركتىڭ تابيعي لاندشافتىنىڭ كەلبەتىن بۇزادى، سونداي-اق تاۋ-تاستارعا ورنى تولماس زيان كەلتىرەدى. جارتاسقا بوياۋ جاعۋعا بىرنەشە سەكۋند جەتكىلىكتى، ال تازارتۋ ءۇشىن كوپتەگەن ساعات جۇمىس ىستەۋگە تۋرا كەلەدى. 10 شارشى سانتيمەترلىك ءبىر ءارىپتى ءوشىرۋ ءۇشىن جاعىلعان بوياۋدىڭ قۇرامى مەن قالىڭدىعىنا بايلانىستى 30-50 مينۋت قاجەت. ۇلتتىق پاركتە ادامداردىڭ قاشاۋ نەمەسە باسقا دا قۇرالداردى قولدانىپ جازۋلاردى ءوز بەتىنشە قولمەن وشىرۋىنە تىيىم سالىنعانىن اتاپ وتكەن ءجون. سەبەبى بۇل تاستىڭ بەتكى قاباتىن جۇقارتىپ، بۇزىلۋىنا اكەپ سوعۋى مۇمكىن. سونداي-اق، ءارتۇرلى بوياۋ ەرىتكىشتەر قورشاعان ورتاعا، اسىرەسە كولدىڭ بيوالۋاندىعىنا تەرىس اسەر ەتەدى»، - دەيدى «بۋراباي» مۇتپ ورمانشىسى قايىرباي بالتابايەۆ.

жартас
Фото: Kazinform

جارتاستاردى تازارتۋ ءۇشىن ۇلتتىق پارك قورشاعان ورتاعا زيانى از، قۇرعاق اعىندى ۆاكۋۋمدى وڭدەۋ ارقىلى جارتاستاردى تازارتاتىن ارنايى قۇرال ساتىپ العان.

«بۇل جۇمساق ءارى ەكولوگيالىق تازارتۋ ءادىسىنىڭ تاۋ جىنىستارىنىڭ بەتكى قاباتىنا اسەرى از. «بۋراباي» مۇتپ قولداناتىن تەحنولوگيادا جوعارى قىسىمسىز، از ابرازيۆتى بولىپ سانالادى. جاڭا تەحنولوگيا ۆاكۋۋم مەن ارنايى تۇيىرشىكتەردى قولدانۋعا نەگىزدەلگەن. تاستىڭ بەتى گەرمەتيكالىق تۇردە بەكىتىلگەن رەاكتيۆتى سورعىش ارقىلى تازارتىلادى. ءدال ءارى جىلدام باعىتتالاتىن ابرازيۆ تاستىڭ بەتىن زاقىمدامايدى، كىر مەن بوياۋدى عانا كەتىرەدى»، - دەپ ءتۇسىندىردى «بۋراباي» مۇتپ ينجەنەر-ەكولوگى مارجان ابدراحمانوۆا.

«ەكولوگيالىق ۆاحتانى» ءبىرىنشى بولىپ بۋراباي ورمان شارۋاشىلىعىنىڭ ينسپەكتورلارى باستاپ وتىر. ولار بولەكتاۋ، كوكشەتاۋ، جەكە باتىر تاۋلارىنىڭ ەڭ كوپ لاستانعان، تۋريستەر ءجيى باراتىن جەرلەرىن تازالايدى.

«بۋرابايدىڭ سيمۆولى - جۇمباقتاستى تازارتۋ قىس مەزگىلىنە، كول بەتىنە مۇز قاتقان ۋاقىتتا جۇرگىزىلەتىن بولدى.

جارتاستاردى تازارتۋ پارك قىزمەتكەرلەرى ءۇشىن ەرەكشە ماڭىزدى جۇمىس بولىپ وتىر. ەكولوگيالىق باستاماعا تۋريستەر دە اتسالىسادى دەگەن ءۇمىت بار.

ءبىز ۇلتتىق پارك قوناقتارىنان تابيعات اياسىندا دەمالۋعا جاۋاپكەرشىلىكپەن قاراۋدى، قورشاعان ورتانى ايالاۋدى، جارتاستاعى ۆانداليزمگە جول بەرمەۋدى، مۇنداي وقيعا تۋرالى بىزگە حابارلاۋدى سۇرايمىز. سۇلۋ تابيعاتتى ساقتاۋ، وعان قامقورلىقپەن قاراۋ ءبارىمىزدىڭ ورتاق بورىشىمىز»، - دەيدى ورمانشى قايىرباي بالتابايەۆ.

اۆتور باقىتجول كاكەش

سوڭعى جاڭالىقتار