بەنزين مەن ديزەل باعاسى 2026 - جىلدىڭ تامىزىنا دەيىن اي سايىن 4 تەڭگەدەن قىمباتتاپ وتىرۋى مۇمكىن
استانا. KAZINFORM - ەنەرگەتيكا مينيسترلىگى جانارماي باعاسىن قالىپتاستىرۋدىڭ جاڭا ساياساتى تۋرالى تۇسىنىك بەردى.

ەنەرگەتيكا مينيسترلىگى قازاقستاننىڭ جانارماي نارىعىنداعى بەنزين مەن ديزەل قۇنىن باعانىڭ «تابىس تەڭسىزدىگى» (ديسپارتيتەت) رەتىندە باعالاپ وتىر. مينيسترلىكتىڭ بەنزين مەن ديزەل باعاسىنىڭ قالىپتاسۋى تۋرالى انىقتاماسىندا مۇنداي تەڭسىزدىك 2024 - جىلى «سۇر ەكسپورتتىڭ» كولەمىن ارتتىرعانى ايتىلعان.
- جانار-جاعارمايدىڭ زاڭسىز سىرتقا شىعارىلۋىنا قارسى قابىلدانىپ جاتقان شارالارعا قاراماستان، بەنزين مەن ديزەل وتىنىنىڭ قورى 1,007 ميلليون توننادان 646 مىڭ تونناعا دەيىن، اي سايىن 10 مىڭنان 50 مىڭ تونناعا دەيىن ازايىپ كەتكەن. ونىڭ ىشىندە بەنزين قورى 453 مىڭ توننادان 382 مىڭ تونناعا دەيىن (-%16)، ديزەل قورى 554 مىڭ توننادان 264 مىڭ تونناعا دەيىن (%52) ازايدى، - دەلىنگەن انىقتامادا.
ۆەدومستۆو ماماندارى جانار- جاعارماي باعاسىن قالىپتاستىرۋداعى ساياساتتىڭ وزگەرۋىنە پرەزيدەنت قاسىم- جومارت توقايەۆتىڭ ەكونوميكانى ىرىقتاندىرۋ جونىندەگى شارالار» تۋرالى جارلىعى سەبەپكەر بولعانىن جازادى.
- 2024 - جىلدىڭ 18- قاراشاسىندا ق ر پرەزيدەنتى جانىنداعى ەنەرگەتيكالىق كەڭەس 2025 -جىلدىڭ قاڭتارىنان باستاپ جانار- جاعارمايدىڭ بولشەك جانە كوتەرمە باعاسىنا قويىلىپ جۇرگەن شەكتى الىپ تاستاۋ تۋرالى شەشىم قابىلدادى. دەي تۇرعانمەن باعانى ءبىر جولدا ليترىنە 50-75 تەڭگەگە كۇرت قىمباتتاتۋدىڭ ورنىنا 2027 - جىلعا دەيىن بىرتىندەپ ءارى ۇدايى تەڭەستىرۋ ارقىلى تەڭگەرىمدى باعا قالىپتاستىرۋ تەتىگى قابىلدانادى. مىسالى، 2025 - جىلدىڭ اقپان ايىنان 2026 - جىلدىڭ تامىزىنا دەيىن نەگىزگى جانارمايدىڭ باعاسىن اي سايىن ليترىنە 4 تەڭگەگە ءوسىرۋ ارقىلى تەڭەستىرىلەدى، - دەلىنگەن ۆەدومستۆو مالىمەتىندە.
ناقتىراق ايتساق، بەنزين باعاسى 2025 -جىلدىڭ اقپانىنان 2026 - تامىزىنا دەيىن ليترىنە 205 تەڭگەدەن 281 دەيىن، ديزەل باعاسى 295 تەڭگەدەن 343 تەڭگەگە دەيىن وسەدى.
- دەگەنمەن، باعانى بىرتىندەپ ءوسىرۋ مەحانيزمى نارىقتاعى احۋالعا، رەسەي فەدەراتسياسىنداعى جانارمايدىڭ جەتكىزۋ قۇنىن ەسەپتەمەگەندەگى باعاسىنا جانە ىرگەلەس ەلدەردەگى ورتاشا باعاعا بايلانىستى قايتا قارالۋى مۇمكىن. ويتكەنى اتالعان ەلدەرگە زاڭسىز جانارماي اعىنى بار جانە قازاقستان ارقىلى جانارماي ترانزيتتەۋگە سۋبسيديا تولەنەدى. ال اۋىل شارۋاشىلىعى ونىمدەرىن وندىرۋشىلەرگە قازىرگى جاناما سۋبسيديانىڭ ورنىنا تىكەلەي سۋبسيديا تولەۋ ماسەلەسى پىسىقتالىپ جاتىر، - دەيدى ەنەرگەتيكا مينيسترلىگى مۇناي تاسىمالداۋ جانە وڭدەۋ دەپارتامەنتى ديرەكتورىنىڭ ورىنباسارى تالعات ماكۋوۆ.
بۇعان دەيىن ەلىمىزدە بەنزين مەن ديزەل باعاسىن مەملەكەت رەتتەمەۋى مۇمكىن ەكەنى تۋرالى مالىمەت شىققان ەدى.