بەنزين باعاسى ءوسۋى مۇمكىن بە - ەنەرگەتيكا ءمينيسترىنىڭ جاۋابى

استانا. KAZINFORM – ق ر ەنەرگەتيكا ءمينيسترى الماسادام ساتقاليەۆ الداعى ۋاقىتتا بەنزين باعاسى ءوسۋى مۇمكىن ەكەنىن ايتىپ، ونىڭ نەگىزگى سەبەبىن ءتۇسىندىردى.

«قازىر بىزدەگى نارىقتا تاپشىلىق بار. تاپشىلىقتى جابۋ جانە ەنەرگەتيكالىق تاۋەلسىزدىكتى قامتاماسىز ەتۋ ءۇشىن ينفراقۇرىلىمدى جاڭعىرتۋ جۇمىستارى اتقارىلىپ جاتىر. مودەرنيزاتسيانى جۇزەگە اسىرۋ ءۇشىن سالاعا اقشانى سالۋ قاجەت. مۇناي ونىمدەرىنىڭ باعاسىنا جابدىقتى ساتىپ الۋعا، تەحنيكالىق قىزمەت كورسەتۋ مەن وزگە دە شىعىندارىنا، لوگيستيكاعا، جاڭا قۇبىرلار مەن تەمىرجول ينفراقۇرىلىمىن سالۋعا تارتىلعان نەسيەلەر كىرەدى. وسى جۇمىستاردىڭ بارلىعى مۇناي ونىمدەرىنىڭ بازالىق قۇنىنا اسەر ەتەدى»، - دەدى ا. ساتقاليەۆ پارلامەنت ماجىلىستەگى ۇكىمەت ساعاتىنان كەيىن تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، جانارمايدىڭ سوڭعى قۇنى ىشكى نارىقتاعى مۇناي باعاسىنىڭ قانداي مەجەدە قالىپتاسۋىنا بايلانىستى بولادى.

«قازىر ىشكى نارىقتاعى مۇناي باعاسى كورشىلەس ەلدەرمەن سالىستىرعاندا ەڭ تومەن، مۇناي ونىمدەرىنىڭ باعاسى دا تومەن دەپ ايتا الامىز. ال ەگەر نارىق اشىلسا، ءبىزدىڭ ارزان ونىمدەرىمىز (كورشى ەلدەرگە) تاراپ كەتەدى. سونىڭ سالدارىنان جانار-جاعارماي باعاسى كۇرت ءوسۋى ىقتيمال»، - دەدى مينيستر.

وسىعان دەيىن الماسادام ساتقاليەۆ جاڭا مۇناي وڭدەۋ زاۋىتى باتىس وڭىردە سالىناتىنى حابارلاعان ەدى.