بەلگىسىز ادامدار وزبەكستاندىقتارعا تەراكت جاساۋعا ۇندەيتىن حاتتار جولداپ جاتىر
تاشكەنت. KAZINFORM - وزبەكستاندا بەلگىسىز ادامدار الەۋمەتتىك جەلىلەر ارقىلى تەررورلىق اكتىلەردى ۇيىمداستىرۋعا شاقىراتىن حابارلامالار تاراتىپ جاتىر، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.
وزبەكستان ءى ءى م مالىمەتىنشە، الەم ەلدەرىندەگى لاڭكەستىك شابۋىلداردان سوڭ وزبەكستان جانە وعان ىرگەلەس مەملەكەتتەردىڭ تۇرعىندارىنا ادامدار كوپ جينالاتىن وبەكتىلەردە تەراكت ۇيىمداستىرۋعا شاقىراتىن حابارلامالار ءتۇسىپ جاتىر.
«ارانداتۋشىلىق حابارلامالاردىڭ كوبى Telegram مەسسەندجەرى ارقىلى جىبەرىلەدى. بەلگىسىز ادامدار ءتۇرلى سومالار تولەۋگە، قارۋ-جاراقپەن قامتاماسىز ەتۋگە جانە ءىس- قيمىل جوسپارىن جىبەرۋگە ۋادە بەرۋدە. ەڭ قورقىنىشتىسى، تەرىس پيعىلدىلار كوبىنە بالالارعا حاتتار جولداپ جاتىر. كەيبىر ەلدەردە ارانداتۋشىلار بۇلدىرشىندەر تۋرالى بارلىق دەرەكتەردى بىلەتىن العا تارتىپ، سول ارقىلى قورقىتىپ، قىسىم كورسەتكەن جاعدايلار تىركەلەدى. مۇنداي ادامداردىڭ سۋرەتتەرى جوق جانە بايلانىس نومىرلەرى جاسىرىلعان»، - دەپ ءمالىم ەتتى ۆەدومستۆودان.
مينيسترلىك ماماندارى مۇنداي حابارلامالاردى العان كەزدە ۇرەيگە بوي الدىرماۋعا، ولاردى وزگە دە چاتتارعا، تانىستارىنا جانە دوستارىنا جىبەرمەۋگە شاقىرادى. تيىسىنشە، دەرەۋ 102 ءنومىرى بويىنشا حابارلاسىپ، ىشكى ىستەر ورگاندارىنا حابارلاۋ قاجەت.
«حاتتى جىبەرگەندەردى بۇعاتتاڭىز جانە ولارعا جاۋاپ بەرىپ، سويلەسۋگە تىرىسپاڭىز. ەسىڭىزدە بولسىن، الاياقتار مۇنى كوپشىلىك اراسىندا دۇربەلەڭ تۋدىرۋ ءۇشىن جاسايدى. ال رەسپۋبليكانىڭ قۇقىق قورعاۋ ورگاندارى قاۋىپسىزدىكتى قامتاماسىز ەتۋ ءۇشىن بارلىق شارالاردى قابىلدايدى»، - دەلىنگەن مينيسترلىكتىڭ مالىمدەمەسىندە.
قوسا كەتسەك، بۇعان دەيىن وزبەكستان پرەزيدەنتى شاۆكات ميرزيەيەۆ رەسەيدەگى تەراكتىگە قاتىستى پىكىر ءبىلدىرىپ، حالىقارالىق احۋالدىڭ ودان سايىن كۇردەلەنە تۇسكەنىن مالىمدەگەن ەدى.
اۆتور
ءاليحان اسقار
