بەلگىلى مەتسەنات، سپورت جاناشىرى ەركىن ءىزباسار كوز جۇمدى

ەلىمىزگە بەلگىلى مەتسەنات، سپورت جاناشىرى ەركىن ءىزباسار بۇگىن تاڭدا كوز جۇمدى، دەپ حابارلايدى Kazinform.

اقتوبەگە عانا ەمەس، ەلىمىزگە بەلگىلى مەتسەنات ەركىن ءىزباساردىڭ قازاسى تۋرالى اقپاراتتى زامانداستارى راستادى. ول بۇگىن تاڭدا كوز جۇمعان.

- ول كىسى كوپتەگەن اۋىر وپەراتسيا جاساتتى. ۇزاق جىلدار بويى اۋىردى. ەركىن ءىزباسار قازاق سپورتىن دامىتۋدا، ونىڭ ىشىندە جاس بالالاردى سپورتقا باۋلۋدا، تاربيەلەۋدە كوپ ۇلەس قوستى. اكەسى جۇماش اعاي باپكەر بولدى، ءوزى دە پالۋان. ءبىرتالاي جىگىتكە كومەكتەستى. اقتوبە وبلىسىندا كۇرەستىڭ دامۋىنا زور ۇلەس قوسقان ادام دەسەم بولادى. توكيو وليمپياداسىنىڭ قولا جۇلدەگەرى نۇريسلام سانايەۆتى الىپ كەلىپ، اقتوبە وبلىسىنا عانا ەمەس، قازاق ەلىنە ۇلكەن جەڭىس سىيلادى. ءوزى مۇگەدەك بولا تۇرا قايىرىمدىلىق اكسياسىنا وتە كوپ قاتىستى. جوق-جىتىككە كومەكتەستى. ەلدىڭ ازاماتى، ەلدىڭ باتىرى دەپ ايتاتىنداي ازامات، - دەدى وبلىستىق ءماسليحات دەپۋتاتى مارات قويلىبايەۆ.

ايتا كەتەيىك، ەركىن ءىزباسار اقتوبە قالالىق سال اۋرۋىنا شالدىققان ازاماتتاردى قولداۋ ورتالىعىنىڭ بارلىق ءىس-شاراسىنا قاتىسىپ، دەمەۋشىلىك جاسادى. ال 2018-جىلى وعان ۇيىمداسقان قىلمىستىق توپ قۇرىپ، وعان جەتەكشىلىك ەتكەنى ءۇشىن ايىپ تاعىلىپ، سوتتالدى.