بەلگىلى عالىم قازاق حالقىنىڭ التىن وردا مۇراگەرى ەكەنىن ايتتى

عالىمنىڭ ىزدەنىسىندەگى نەگىزگى باعىتتاردىڭ ءبىرى - اباي قۇنانباي ۇلىنىڭ ءومىرى مەن شىعارماشىلىعىن زەرتتەۋ.

- ءبىزدىڭ رۋحاني تەمىرقازىعىمىز - اباي. مەنىڭ «تولىق ادام» اتتى ەكى كىتاپتان تۇراتىن ەڭبەگىم ابايدىڭ كوركەم الەمىن، «تولىق ادام» ءىلىمىن عىلىمي تۇرعىدان ساتى-ساتىسىمەن تالداپ، تۇسىندىرۋگە ارنالعان. مۇحتار اۋەزوۆتىڭ ءومىرى مەن شىعارماشىلىعى تۋرالى «بەسىگىڭدى ۇمىتپا» دەگەن اتاۋمەن ءۇش كىتاپ جازدىم. ال مۇنداعى باستى ماقساتىم - اۋەزوۆ ارقىلى ابايدىڭ ىشكى جان دۇنيەسىنە بارلاۋ جاساپ، ونى تەرەڭىرەك تۇسىنۋگە ۇمتىلۋ ەدى. «ابايدى اۋەزوۆ ارقىلى ءتۇسىندىم» دەسەم، شىندىققا جاناسادى، - دەدى تۇرسىن جۇرتباي.

عالىم ۇلىلاردىڭ مۇراسىن زەردەلەۋ وتكەندى تانۋمەن قاتار، بۇگىنگە باعا بەرىپ، بولاشاققا باعدار جاساۋعا مۇمكىندىك بەرەدى دەپ سانايدى. وسى رەتتە ول التىن وردا تاريحى مەن قازاق مەملەكەتتىلىگىنىڭ ساباقتاستىعىن زەرتتەۋگە ءمان بەرەدى.

- ءبىز التىن وردانىڭ قۇلاۋ سەبەپتەرىن، ونىڭ ىشكى جانە سىرتقى ساياساتىن، جەر مەن ءتىل ماسەلەلەرىنە قاتىستى ۇستانىمدارىن بۇگىن جاڭاشا ءارى اشىق تالداپ، ودان تاريحي ساباق الۋىمىز كەرەك، - دەدى سپيكەر.

ونىڭ پىكىرىنشە، بۇل تاريحي ساباقتاستىقتى زەرتتەۋ تاريحشىلارمەن عانا شەكتەلمەۋى كەرەك.

- پرەزيدەنتتىڭ التىن وردا تۋرالى ۇستانىمىن قازاقتىڭ باستى ۇلتتىق يدەيالارىنىڭ ءبىرى رەتىندە جان-جاقتى ءتۇسىندىرۋ قاجەت، - دەدى ول.

تۇرسىن جۇرتبايدىڭ شىعارماشىلىق مۇراسىندا كوركەم تۋىندىلاردىڭ دا ورنى بولەك. سولاردىڭ ءبىرى - «قار استىنداعى كوبەلەك».

- بۇل - جۇرەكتە ساقتالىپ كەلە جاتقان مۇڭ-ساعىنىشتىڭ، اڭسار كۇيدىڭ تولعاۋى، - دەدى عالىم.

ايتا كەتەيىك، تۇرسىن جۇرتباي شىعارماشىلىق جولىن اقىندىقتان باستاپ، كەيىن پروزا مەن عىلىمعا بەت بۇردى. ونىڭ اباي مەن اۋەزوۆ مۇراسىن زەرتتەۋگە، الاش تاريحىن زەردەلەۋگە ارنالعان «دۋلىعا»، «ۇرانىم - الاش!»، «بەسىگىڭدى ۇمىتپا»، «تولىق ادام» سىندى ەڭبەكتەرى - ونداعان جىلدىق ىزدەنىستىڭ ناتيجەسى.

بۇعان دەيىن فرانسۋز تاريحشىسى التىن وردا مەن كوشپەلى حالىقتار تۋرالى قالىپتاسقان كوزقاراستى وزگەرتكىسى كەلگەنىن ايتقان بولاتىن.