بەلگىلى بالۋان قازاقستان كۇرەس فەدەراتسياسىنىڭ ۆيتسە-پرەزيدەنتى بولدى

بۇگىن استانا قالاسى «Park Inn Radisson Astana» قوناق ءۇيىنىڭ ءماجىلىس زالىندا گرەك-ريم، ەركىن جانە ايەلدەر كۇرەسى ۇلتتىق فەدەراتسياسىنىڭ جىلدىق ەسەپ بەرۋ كونفەرەنتسياسى ءوتتى، دەپ حابارلايدى Kazinform.

قازاقستان كۇرەس فەدەراتسياسىنىڭ باسپا ءسوز قىزمەتى ءمالىم ەتكەندەي، اتالمىش جيىندا ەركىن كۇرەستەن ازيا چەمپيونى، جاس وسپىرىمدەر اراسىنداعى الەم چەمپيونى نۇرجان قاتايەۆ قازاقستان كۇرەس فەدەراتسياسىنىڭ ۆيتسە-پرەزيدەنتى بولىپ سايلاندى.

نۇرجان قاتايەۆ ەركىن كۇرەستەن حالىقارالىق دارەجەدەگى سپورت شەبەرى. بۇگىنگە دەيىن سپورت سالاسىندا تالماي ەڭبەك ەتىپ كەلەدى.

سونىمەن بىرگە، اتىراۋ وبلىستىق كۇرەس فەدەراتسياسىن باسقارعان اسقار قۇلوۆ تا ۆيتسە-پرەزيدەنتتىككە سايلاندى.

سونداي-اق، قازاقستان كۇرەس فەدەراتسياسىنىڭ كونفەرەنتسياسىندا 2024-جىلعا ارنالعان جوسپارلار تالقىلاندى.

اۆتور كۇنسۇلتان وتارباي