بەلگىلى بالۋان باسشىلىق قىزمەتكە تاعايىندالدى
استانا. KAZINFORM - تانىمال قازاقستاندىق بالۋان ماقسات ەرەجەپوۆ قوستاناي وبلىستىق گرەك-ريم، ەركىن جانە ايەلدەر كۇرەسى فەدەراتسياسىنىڭ پرەزيدەنتى بولىپ تاعايىندالدى.
بۇل تۋرالى وڭىردەگى كۇرەس فەدەراتسياسىنىڭ باسپا ءسوز قىزمەتى ءمالىم ەتتى.
- بۇگىن فەدەراتسيا پرەزيدەنتى داۋلەت تۇرلىحانوۆتىڭ شەشىمىمەن ماقسات ارشاباي ۇلى رەسمي تۇردە قوستاناي وبلىسىنىڭ گرەك-ريم، ەركىن جانە ايەلدەر كۇرەسى فەدەراتسياسىنىڭ پرەزيدەنتى بولىپ تاعايىندالدى، - دەلىنگەن حابارلامادا.
ماقسات ارشاباي ۇلى — گرەك-ريم كۇرەسىنەن حالىقارالىق دارەجەدەگى سپورت شەبەرى، ازيانىڭ ءۇش دۇركىن چەمپيونى، اسكەريلەر اراسىنداعى الەم چەمپيوناتىنىڭ قولا جۇلدەگەرى، سونداي-اق قازاقستان رەسپۋبليكاسىنىڭ بەس دۇركىن چەمپيونى.
بۇل تاعايىنداۋ وڭىردەگى كۇرەس سپورتىنىڭ دامۋىنا جاڭا سەرپىن بەرىپ، جاس تالانتتاردىڭ كوكجيەگىن كەڭەيتەتىن تىڭ بەلەستەرگە باستايدى دەپ سەنەمىز. ماقسات ارشاباي ۇلىنىڭ تاجىريبەسى مەن كاسىبي بىلىكتىلىگى قوستاناي وبلىسىنىڭ سپورتتىق جەتىستىكتەرىن ەسەلەي تۇسەرى انىق.
ال قوستاناي وبلىسىنىڭ گرەك-ريم، ەركىن جانە ايەلدەر كۇرەسى فەدەراتسياسىنىڭ اتقارۋشى ديرەكتورى قىزمەتىنە تالعات جيەنتايەۆ تاعايىندالدى.
ەستەرىڭىزگە سالا كەتەيىك، كەشە استانادا قازاقستان رەسپۋبليكاسىنىڭ گرەك-ريم، ەركىن جانە ايەلدەر كۇرەسى فەدەراتسياسىنىڭ 2024-جىلدىڭ قورىتىندىسىنا ارنالعان ەسەپ بەرۋ كونفەرەنسياسى ءوتىپ، جىلدىڭ ۇزدىكتەرى ماراپاتتالعان بولاتىن.
اۆتور كۇنسۇلتان وتارباي
