بەلگيانىڭ 12 ۋنيۆەرسيتەتىمەن كەلىسىمشارت ورناتامىز - ساياسات نۇربەك

بۇل تۋرالى عىلىم جانە جوعارى ءبىلىم ءمينيسترى ساياسات نۇربەك اقوردا كۋلۋارىندا ايتتى.

ءمينيستردىڭ مالىمەتىنشە، ەرتەڭ العاش رەت قازاقستان- بەلگيا جوعارى ءبىلىم فورۋمى وتەدى. فورۋمعا بەلگيانىڭ 12 ۋنيۆەرسيتەتىنىڭ رەكتورى قاتىسادى. قازاقستان تاراپىنان ۇلتتىق جانە تەحنيكالىق جوعارى وقۋ ورىندارىنىڭ باسشىلارى كەلەدى. جيىنعا قازاقستان پرەزيدەنتى قاسىم-جومارت توقايەۆ پەن بەلگيا كورولى فيليپپ تە قاتىسادى.

ساياسات نۇربەكتىڭ ايتۋىنشا، بيىل ماۋسىمدا مەملەكەت باسشىسىنىڭ بريۋسسەلگە رەسمي ساپارىندا ەكى ماڭىزدى كەلىسىمگە قول قويىلعان.

- ءبىرىنشىسى - گەنت ۋنيۆەرسيتەتى مەن Alem.ai ورتالىعى اراسىندا «جاساندى ينتەللەكت جانە ماتەماتيكا» ارنايى زەرتحاناسىن اشۋ تۋرالى كەلىسىم. اسىرەسە بەلگيالىقتار الگوريتمدەر مەن ماتەماتيكالىق مودەلدەۋدە وتە مىقتى. ەكىنشى ماڭىزدى كەلىسىم بەلگيانىڭ ەڭ ۇزدىك ۋنيۆەرسيتەتتەرىنىڭ ءبىرى ليەۆەنمەن جاسالعان. ول الەمنىڭ توپ-50 وقۋ ورنى قاتارىنا كىرەدى جانە 600 -جىلدىق تاريحى بار. سول ۋنيۆەرسيتەت پەن وسكەمەندەگى شىعىس قازاقستان تەحنيكالىق ۋنيۆەرسيتەتى «سيرەك مەتالداردى بايىتۋ جانە مەتاللۋرگيا» ورتالىعىن اشادى، - دەدى س. نۇربەك تىلشىلەرگە بەرگەن سۇحباتىندا.

مينيستر قازاقستاندا سيرەك مەتالدار قورى مول ەكەنىن، الايدا ولاردى بايىتۋ، سول شيكىزاتتان قاجەتتى كومپونەنتتەر ءوندىرۋ، چيپتەر مەن عارىش تەحنولوگيالارىنا ارنالعان ماتەريالدار جاساۋ ادىستەرىن ءالى دە دامىتۋ كەرەگىن ايتتى.

- جاقىندا پرەزيدەنتتىڭ كورەياعا بارعان ساپارىندا ءبىز كورەيانىڭ كيرام سيرەك مەتالدار ورتالىعىمەن ارنايى كەلىسىمشارتقا قول قويدىق. كورەيا ۇكىمەتى بۇل جوباعا 14,5 ميلليون دوللار ينۆەستيتسيا قۇيادى. كەلەر جىلى الماتىدا ساتپايەۆ ۋنيۆەرسيتەتىنىڭ نەگىزىندە «كەن بايىتۋ جانە سيرەك مەتالدار» ورتالىعى اشىلادى، - دەپ ەسكە سالدى ول.

سپيكەردىڭ ايتۋىنشا، ەرتەڭگى قازاقستان- بەلگيا جوعارى ءبىلىم فورۋمىندا جالپى 12 كەلىسىمگە قول قويىلادى. قۇجاتتار قوس ديپلومدى ماگيستراتۋرا مەن دوكتورانتۋرا باعدارلامالارىن ىسكە اسىرۋدى، سونداي-اق «بولاشاق» باعدارلاماسى اياسىندا دوكتورانتتاردى بەلگيانىڭ جەتەكشى ۋنيۆەرسيتەتتەرىنە عىلىمي تاعىلىمداماعا جىبەرۋدى قامتيدى.

ساياسات نۇربەك ميكروەلەكترونيكا مەن چيپ يندۋسترياسىن دامىتۋدى دا ماڭىزدى باعىتتاردىڭ ءبىرى رەتىندە اتادى.

- بەلگيادا الەمدىك چيپ يندۋسترياسى ءۇشىن ماڭىزدى ءىرى ورتالىق بار. بەلگيا مەن نيدەرلاندتا چيپتەردىڭ ديزاينىن ازىرلەيتىن مامانداندىرىلعان ورتالىقتار جۇمىس ىستەيدى. رەسمي ساپار كەزىندە وسى باعىتتا كەزدەسۋلەر وتكىزىپ، كەلىسسوز جۇرگىزدىك. ازىرگە ناقتى كەلىسىمشارت جاسالعان جوق، سوندىقتان جۇمىستى جالعاستىرامىز، - دەدى مينيستر.

ايتا كەتەيىك، 11-14-قازان كۇندەرى بەلگيالىقتار كورولى فيليپپ جانە پاتشايىم ماتيلدانىڭ قازاقستانعا مەملەكەتتىك ساپارى وتەدى.

ساپار باعدارلاماسى ءتورت نەگىزگى باعىتتى قامتيدى. ولار - اسا ماڭىزدى پايدالى قازبالار، جاساندى ينتەللەكت، دەنساۋلىق ساقتاۋ، سونداي-اق تاريح پەن مادەنيەت.

بەلگيانىڭ فەدەرالدىق ءمينيسترى جان-ليۋك كريۋيكە قازاقستاندىقتار قىزمەتتىك پاسپورتپەن ەۋروپانىڭ ءۇش ەلىنە ۆيزاسىز بارا الاتىنىن مالىمدەگەن ەدى.