بەلگيادا انتيتەررورلىق وپەراتسيا: جەتى ادام قاماۋعا الىندى

استانا. kazinform - بەلگيادا بىرنەشە ءۇيدى ءتىنتۋ كەزىندە لاڭكەستىك ارەكەتكە قاتىسى بار دەگەن كۇدىكپەن جەتى ادام قاماۋعا الىندى.

بەلگيا باسپا ءسوزى انتۆەرپەن فەدەرالدى سوت پوليتسياسىنىڭ لاڭكەستىك ىستەرگە ماماندانعان تەرگەۋ سۋدياسىنىڭ ءوتىنىشى بويىنشا توعىز قالادا 14 ءتىنتۋ جۇرگىزگەنىن جازدى.

وپەراتسيانىڭ ماقساتى - لاڭكەستىك توپتىڭ قىزمەتىنە قاتىستى، تەرروريزمدى قارجىلاندىرعان جانە لاڭكەستىك ارەكەتتى دايىنداعانداردى ۇستاۋ بولدى.

ۇيلەردى ءتىنتۋ انتۆەرپەن، سەرەنس، سەنت- حوسە- تەن- نۋدە، مەنين، بۋرگ- لەوپولد، لەج، كورترييك، گەنت جانە زونحوۆەن قالالارىندا جۇرگىزىلدى. بارلىعى جەتى ادام قاماۋعا الىنىپ، تەرگەۋگە الىندى.

بەلگياداعى لاڭكەستىك قاۋىپ-قاتەردىڭ جالپى دەڭگەيى 1 دەن 4 كە دەيىنگى شكالا بويىنشا 3 كە قويىلدى، ياعني 2023 -جىلعى 16-قازاندا بريۋسسەلدە بولعان تەراكتىدەن كەيىن قاۋىپ «مۇمكىن جانە ىقتيمال» دەگەندى بىلدىرەدى.

RTBF پوليتسيانىڭ ارەكەت ەتۋ ۋاقىتى، ەڭ بولماعاندا، ەرتەڭ باستالاتىن پاريج وليمپياداسىنا بايلانىستى ەكەنىن جانە قاۋىپسىزدىك قىزمەتى تاۋەكەلگە بارعىسى كەلمەيتىنىن حابارلادى.

فرانكوفوندىق باق سونىمەن قاتار تۇتقىنداۋلار ىقتيمال يسلاميستىك قاۋىپپەن بايلانىستى ەكەنىن جانە وسىنداي تۇتقىنداۋلار ەۋروپانىڭ باسقا جەرلەرىندە ءبىر ۋاقىتتا جاسالعانىن اتاپ ءوتتى.

اۆتور
ەركەجان سماعۇلوۆا