بەلگيادا 27 جىل بويى جالعان اتپەن جاسىرىنىپ جۇرگەن قىلمىسكەر ەلگە جەتكىزىلدى
الماتى. KAZINFORM - ادام ۇرلاپ، ءولتىردى دەگەن كۇدىككە ىلىنگەن قازاقستاندىق جالعان اتپەن بەلگيادا 27 جىل بويى جاسىرىنىپ كەلگەن.
الماتىنىڭ كريمينالدىق پوليتسياسىنىڭ مالىمەتىنشە، 63 جاستاعى قازاقستاندىق 1997 -جىلى ماۋسىمدا رەسەيدىڭ نوۆوسيبيرسك قالاسىندا وتانداسىمىزدى ۇرلاپ، ءولتىرۋ ىسىنە قاتىسقان، كەزىندە ونى بوساتۋ ءۇشىن تۋىستارىنان 100 مىڭ دوللار وتەماقى تالاپ ەتكەن.
ول بۇل اۋىر قىلمىستى الدىن الا ءسوز بايلاسۋ ارقىلى جاساعانى بەلگىلى بولدى.
«تەرگەۋ بارىسىندا قىلمىسقا قاتىسۋشىلار ۇستالىپ، ولارعا ءتۇرلى جازالار تاعايىندالدى. سوت ورگاندارىنان قاشىپ كەتكەن قىلمىسكەرلەردىڭ بىرىنە قاتىستى سىرتتاي قاماۋعا الۋ تۇرىندەگى بۇلتارتپاۋ شاراسى، سونداي- اق مەملەكەتارالىق جانە حالىقارالىق ىزدەۋ جاريالاندى. ىزدەۋدەگى ازامات جالعان دەرەكتەرمەن بەلگيادا جاسىرىنىپ جۇرگەنى بەلگىلى بولدى. الماتى قالالىق پروكۋراتۋراسىنىڭ ۇيلەستىرۋىمەن جانە ينتەرپولدىڭ كومەگىمەن كۇدىكتى ۇستالىپ، الماتى قالاسىنا جەتكىزىلدى»، - دەدى، الماتى قالالىق پوليتسيا دەپارتامەنتى باستىعىنىڭ ورىنباسارى قۋاتبەك ناۋاتوۆ.
