بەلگيا كورولى مەن پاتشايىمى قازاقستانعا كەلەدى: ساپاردىڭ كۇن ءتارتىبى قانداي

وسىعان وراي، كورولدىكتىڭ استاناداعى ەلشىلىگى العاشقى مەملەكەتتىك ساپاردىڭ قالاي وتەتىنىن، قانداي تاقىرىپتاردى تالقىلايتىنىن ءتۇسىندىردى.

بەلگيا ەلشىلىگىنىڭ مالىمدەۋىنشە، ساپار باعدارلاماسى ءتورت نەگىزگى باعىتتى قامتيدى. ولار - اسا ماڭىزدى پايدالى قازبالار، جاساندى ينتەللەكت، دەنساۋلىق ساقتاۋ، سونداي-اق تاريح پەن مادەنيەت.

سونداي-اق بەلگيادان قازاقستانعا 110 ادامنان تۇراتىن دەلەگاتسيا كەلەدى. ونىڭ قۇرامىندا ءتورت مينيستر، 25 كومپانيا باسشىسى، 10 ۋنيۆەرسيتەت رەكتورى جانە 13 جۋرناليست بار.

مينيسترلەردىڭ ءبىرى فەدەرالدىق ۇكىمەت اتىنان قاتىسىپ، كولىك قاتىناسى، كليمات جانە ەكولوگيالىق ترانسفورماتسيا ماسەلەلەرىنە جاۋاپ بەرەدى. ال قالعان ۇشەۋى - وڭىرلىك دەڭگەيدەگى مينيسترلەر. دەلەگاتسيا قۇرامىنىڭ اۋقىمدى بولۋى بەلگيا تاراپىنىڭ الداعى ساپارعا جوعارى قىزىعۋشىلىق تانىتىپ وتىرعانىن كورسەتەدى.

بەلگيا كورولى مەن كوروليەۆاسى استانا مەن الماتىدا قايدا بارادى

بەلگيا مونارحتارىنىڭ مەملەكەتتىك ساپارى اقوردادا وتەتىن رەسمي قارسى الۋ راسىمىنەن باستالادى. ودان كەيىن قازاقستان پرەزيدەنتى قاسىم-جومارت توقايەۆپەن شاعىن جانە كەڭەيتىلگەن قۇرامدا كەلىسسوزدەر جۇرگىزەدى.

بۇدان سوڭ كورول مەن كوروليەۆا استانا مەن الماتىداعى مادەنيەت جانە عىلىم نىساندارىن ارالاپ، ەكى ەل اراسىنداعى ىنتىماقتاستىققا ارنالعان كەزدەسۋلەرگە قاتىسادى.

ساپار باعدارلاماسىنداعى ماڭىزدى نىسانداردىڭ ءبىرى - استاناداعى ۇلتتىق بالالاردى وڭالتۋ ورتالىعى. وندا تاراپتار دەنساۋلىق ساقتاۋ سالاسىنداعى ىنتىماقتاستىق مۇمكىندىكتەرىن تالقىلايدى.

قازاقستاننىڭ ۇلتتىق مۋزەيىندە قوناقتارعا بەلگيالىق ايگىلى سۋرەتشى دجەيمس ەنسوردىڭ كورمەسى ۇسىنىلادى.

ال نازاربايەۆ ۋنيۆەرسيتەتىندە - اسا ماڭىزدى پايدالى قازبالار سالاسىنداعى قازاقستان مەن بەلگيا ىنتىماقتاستىعىنا ارنالعان دوڭگەلەك ۇستەل وتەدى. سونداي-اق قازاقستان-بەلگيا ىسكەرلىك كەڭەسىنىڭ ءتورتىنشى وتىرىسى ۇيىمداستىرىلادى.

Alem.AI ورتالىعىندا - بەلگيا كورولى مەن كوروليەۆاسى سينگۋليارلىق مۋزەي مەن TUMO مەكتەبىن ارالايدى. مۇندا قازاقستان مەن بەلگيا ۋنيۆەرسيتەتتەرى رەكتورلارىنىڭ فورۋمى دا وتەدى. وندا جاساندى ينتەللەكتىنى عىلىم مەن ءبىلىم بەرۋ سالاسىندا قولدانۋ ماسەلەلەرى تالقىلانادى.

مەملەكەتتىك ساپار اياسىندا كورولدىك جۇپ الماتىعا دا بارادى. قالاداعى ساپار باعدارلاماسىنا يادرولىق فيزيكا ينستيتۋتىنا بارۋ ەنگىزىلگەن. وندا تاراپتار يادرولىق مەديتسينا سالاسىنداعى ىنتىماقتاستىق مۇمكىندىكتەرىن قاراستىرادى.

سونىمەن بىرگە، كورول مەن كوروليەۆا Almaty Museum of Arts ونەر مۋزەيىن ارالايدى.

قازاقستان مەن بەلگيا ساۋداسى:

قازاقستان بەلگياعا نەگىزىنەن وسىمدىك تەكتەس ونىمدەر، سونىڭ ىشىندە زىعىر تۇقىمىن ەكسپورتتايدى. 2025-جىلى زىعىر تۇقىمى ەكسپورتىمىزدىڭ جارتىسىنا جۋىعىن قۇراعان. ونىڭ قۇنى 74,6 ميلليون ەۋروعا جەتىپ، جالپى ەكسپورتتىڭ 46,2 پايىزىن الادى. ەكىنشى ورىندا مينەرالدىق ونىمدەر - 61,1 ميلليون ەۋرو (37,9 پايىز)، ءۇشىنشى ورىندا باعالى ەمەس مەتالدار - 14,2 ميلليون ەۋرو (8,8 پايىز).

بۇدان بولەك، قازاقستان بەلگياعا حيميا ونەركاسىبى ونىمدەرىن، توقىما بۇيىمدارىن جانە باسقا دا تاۋارلاردى جەتكىزگەن. بۇل دەرەكتەر بەلگيانىڭ سىرتقى ساۋدا اگەنتتىگىنىڭ مالىمەتتەرىندە كەلتىرىلگەن.

ال قازاقستان بەلگيادان نەگىزىنەن حيميا جانە فارماتسيەۆتيكا ونىمدەرىن، اسىرەسە ءدارى-دارمەك پەن ۆاكسينالاردى ساتىپ الادى. 2025-جىلى بۇل تاۋارلار يمپورتىمىزدىڭ 48,4 پايىزىن قۇراپ، جالپى قۇنى 292,5 ميلليون ەۋرو بولدى.

سونداي-اق قازاقستان بەلگيادان ونەركاسىپتىك جابدىقتار مەن تەحنيكا بولشەكتەرىن (92,2 ميلليون ەۋرو نەمەسە 15,3 پايىز)، كولىك قۇرالدارىن، سونىڭ ىشىندە جۇك تارتقىشتارى مەن جەڭىل اۆتوموبيلدەردى (77,1 ميلليون ەۋرو نەمەسە 12,8 پايىز) يمپورتتاعان.

ەكى ەل اراسىنداعى ساۋدا كولەمى ءوسىپ كەلەدى. 2026-جىلدىڭ العاشقى ءۇش ايىندا قازاقستاننىڭ بەلگياعا ەكسپورتى 12,3 پايىزعا ءوسىپ، 44,7 ميلليون ەۋروعا جەتتى. ال بەلگيانىڭ قازاقستانعا ەكسپورتى 9,2 پايىزعا ارتىپ، 147,4 ميلليون ەۋرونى قۇرادى.

ەسكە سالا كەتسەك، ماۋسىم ايىندا پرەزيدەنت قاسىم-جومارت توقايەۆ بەلگيا كورولدىگىنە رەسمي ساپارمەن باردى.