بلوگەرلەر توعىز ايدا 1,2 ميلليارد تەڭگە سالىق تولەدى
استانا. KAZINFORM - ەلىمىزدە رەسمي تۇردە 745 بلوگەر تىركەلگەن. ولار وسى جىلىدڭ 9 ايىندا مەملەكەتكە 1,2 ميلليارد تەڭگەدەن استام سالىق تولەدى. بۇل تۋرالى مەملەكەتتىك كىرىستەر كوميتەتىنەن ءمالىم ەتتى.
«قازاقستان رەسپۋبليكاسىنىڭ «ونلاين-پلاتفورمالار جانە ونلاين-جارناما تۋرالى» زاڭىنىڭ ەرەجەلەرىنە سايكەس ينفليۋەنسەر (بلوگەر) - ونلاين-پلاتفورمادا باسقا دا تۇلعالارعا اقپاراتتى كاسىپكەرلىك قىزمەت ماقساتىندا جاريالايتىن ونلاين-پلاتفورمانى پايدالانۋشى. بۇگىنگى تاڭدا رەسپۋبليكا بويىنشا 745 بلوگەر (ءتىزىم الەۋمەتتىك جەلىلەردە - Instagram ،Youtube ،TikTok-تا 20 مىڭنان استام جازىلۋشىسى بار جەكە تۇلعالاردان قۇرىلعان) بار. سالىق كودەكسىنە سايكەس، بلوگەرلەردىڭ، ونىڭ ىشىندە جارناما بەرۋدەن نەمەسە اقپاراتتىق ونىمدەردى جىلجىتۋدان تۇسەتىن تابىستارعا سالىق سالىنادى»، - دەپ اتاپ وتەدى كوميتەتتەن اگەنتتىكتىڭ رەسمي ساۋالىنا وراي.
ۆەدومستۆو مالىمەتىنشە، ەگەر بلوگەر جالدامالى جۇمىسكەرلەردىڭ ەڭبەگىن پايدالانسا نەمەسە ونىڭ جىلدىق تابىسىنىڭ مولشەرى 12 ەڭ تومەنگى جالاقىدان اسسا (2024 -جىلعى 1-قاڭتاردان باستاپ ەڭ تومەنگى جالاقى - 85000 تەڭگە، بۇل 1020000 تەڭگەنى قۇرايدى) جەكە كاسىپكەر رەتىندە تىركەلۋگە مىندەتتى.
«جالپى، وتاندىق بلوگەرلەردىڭ كوپشىلىگى قازىردىڭ وزىندە كاسىپكەر سانالادى جانە قولدانىلاتىن سالىق رەجيمىنە بايلانىستى ءتيىستى سالىقتاردى تولەيدى. ماسەلەن، سوڭعى 9 ايدا ولار 1 ميلليارد 226 ميلليون تەڭگەدەن استام سوماعا سالىق تولەدى»، - دەدى كوميتەتتەن.
ايتا كەتەيىك، بلوگەرلەر ب ا ق رەتىندە تىركەلە الادى. ءبىراق ولار رەسمي تىركەلگەن جاعدايدا ماسس-مەديا تۋرالى زاڭ تالاپتارىن ورىنداۋى كەرەك.
اۆتور
مارلان جيەمباي
