بلوگەرلەر ب ا ق وكىلى رەتىندە تىركەلىپ، جۇمىس ىستەي الا ما

استانا. KAZINFORM - كاسىبي جۋرناليستەر مەن بلوگەرلەردىڭ مارتەبەسى تەڭ بە؟ بلوگەرلەر ب ا ق وكىلى رەتىندە رەسمي تىركەلە الا ما؟ بۇل ساۋالدى مادەنيەت جانە اقپارات ۆيتسە-ءمينيسترى قانات ىسقاقوۆتان سۇراعان ەدىك.

«ماسس-مەديا تۋرالى زاڭ جوباسىن ازىرلەگەندە بىزدەن كاسىبي جۋرناليستەر مەن بلوگەرلەردىڭ ارا-جىگىن اجىراتۋ كەرەكتىگى تالاپ ەتىلدى. ءبىز بۇل ماسەلەنى سارالاي كەلە كاسىبي جۋرناليستەردىڭ مارتەبەسىن كەڭەيتىپ، وكىلەتتىك بەرىپ وتىرمىز. الدىمەن جۋرناليستەردىڭ ساۋالىنا جاۋاپ بەرۋ مەرزىمى 7 كۇننەن 5 كۇنگە قىسقارتىلدى. ال بلوگەرلەر مەن جەلى قولدانۋشىلاردىڭ ساۋالىنا جاۋاپ 15 پەن 30 كۇن ارالىعىندا بەرىلەدى»، - دەدى قانات ىسقاقوۆ Astana Media Week ءىس-شاراسى بارىسىندا ب ا ق وكىلدەرىنىڭ ساۋالىنا جاۋاپ بەرە تۇرىپ.

سونداي-اق، ۆيتسە-مينيستر بلوگەرلەردىڭ رەسمي تىركەلە الاتىنىن ايتىپ وتىر.

«بلوگەرلەر ب ا ق رەتىندە تىركەلە الادى، ءبىراق ولار رەسمي تىركەلگەن جاعدايدا ماسس-مەديا تۋرالى زاڭ تالاپتارىن ورىنداۋى كەرەك. تىركەلۋ پروتسەسى وڭتايلاندىرىلعان، ءبىراق بەلگىلى ءبىر تالاپتار قويىلادى»، - دەيدى ول.

بۇعان دەيىن ۆيتسە-مينيستر جىل باسىنان بەرى سۋيتسيدتى ناسيحاتتاعان 150 دەن استام فاكتى انىقتالىپ، جاريالانعان الەۋمەتتىك پاراقشالار مەن ينتەرنەت رەسۋرستاردىڭ بۇعاتتالعانىن ايتقان ەدى.

سونداي-اق، قانات ىسقاقوۆ مادەنيەت جانە اقپارات مينيسترلىگىنىڭ Telegram پايدالانۋشىلارىنىڭ تەلەفوندارى مەن IP مەكەنجايلارى قۇقىق قورعاۋ ورگاندارىنىڭ رەسمي ءوتىنىشى بويىنشا قاۋىپسىزدىك قىزمەتكەرلەرىنە قولجەتىمدى بولۋى مۇمكىن باستاماسىن قولدايتىنىن جەتكىزدى.

ايتا كەتەيىك، ەلوردادا Astana Media Week اپتالىعى ءوتىپ جاتىر.

ءداستۇرلى شارانىڭ بيىلعى تاقىرىبى - «مەديانىڭ اسەرى جانە سيفرلىق ۇندەستىك».