"بەلدى تايانبا!" دەگەن ىرىمنىڭ استارىندا نە بار؟

قازاقتىڭ ءاربىر ىرىم- تىيىمىندا تاربيەلىك ءمان- ماعىنا جاتىر. دەگەنمەن كەيبىر ۇلكەندەر بالاعا تىيىم سالعان كەزدە، ونىڭ ءمانىن تۇسىندىرە بەرمەيدى.

سونىڭ ءبىرى "بەلىڭدى تايانبا" دەگەن ءسوز تىركەسى. بۇل تىيىمنىڭ استارىندا نە بار؟ ماعىناسىن ەتنوگراف بولات بوپاي ۇلى Massaget.kz تىلشىسىنە ءتۇسىندىردى.

بولات بوپاي ۇلىنىڭ ايتۋىنشا، بەلدى تايانۋ تاكاپپارلىق سانالادى.

"قازاق بەلىن تايانىپ، شىرەنبەيدى. ول استامدىق، تاكاپپارلىق، جامان ارەكەت بولىپ سانالادى. بۇرىن دولى، اشۋشاڭ، ۇرىسقاق ايەلدەر ءبۇيىرىن تايانىپ، قارعىس ايتاتىن بولعان. سوندىقتان وسىنداي سولەكەت كورىنىس جاساۋ جامان ىرىم سانالعان"، - دەپ ءتۇسىندىردى ەتنوگراف.

ال ەتنوگراف زەينەپ احمەتوۆا بۇل تىيىمدى جاقىن ادامى قايتىس بولعاندا جوقتاۋ ايتىپ جىلايتىن ايەل عانا بەلىن تايانادى دەپ تۇسىندىرگەن.

"ءبىر ءۇيدىڭ ادامى قازا بولعاندا ول ادامنىڭ جاقىندارى قيماستىقپەن ەگىلىپ، سولقىلداپ جىلايدى. مۇنداي كەزدە ادامنىڭ ىشكى اعزاسىنىڭ بارلىعى بىردەي قوزعالىسقا تۇسەدى. سولقىلداپ جىلاعاندا بۇيرەك پەن باۋىر سوزىلىپ كەتۋى مۇمكىن. مۇنىڭ بارلىعى جۇرەككە سالماق سالادى. وسىنداي قازا ۇستىندە قارالى ءۇيدىڭ ادامدارى بەلدەرىن مىقتاپ بۋادى.

بەلىن مىقتاپ بۋعان ادامنىڭ ىشكى قۇرىلىسى جىلاعان كەزدە بوس تۇرمايدى. سودان كەيىن ەكى ءيىنى ءتۇسىپ بۇكشيىپ قالمايدى، ويتكەنى بەلى بۋىلعان ادامنىڭ يىعى كوتەرىلەدى. ەكى بارماقتى بەلدى بۋعان جەرگە، مىقىننان سۇعىپ وتىرعاندا ادام ەڭسەسى تۇسپەي، تىكتەلە تۇسەدى. ءبىر جاعىنان، بۇل - سۇيەۋ، تىرەۋ. مۇنى ۇيدەگى ايەلدەر ىستەيدى. ولار ورامالدىڭ ىشىنەن بايلاۋىشپەن باسىن دا مىقتاپ بايلايدى. جايشىلىقتا ءبۇيىردى تايانۋ جاماندىق شاقىرعانمەن بىردەي"، - دەگەن ول.