بۇل ساپار ەكىجاقتى سەرىكتەستىگىمىز ءۇشىن ماڭىزدى جىلمەن تۇسپا-تۇس كەلىپ وتىر - ماكرون

 ەممانيۋەل ماكرون قازاقستان مەن فرانسيا اراسىنداعى بايلانىستارعا جوعارى باعا بەردى، دەپ حابارلايدى Kazinform اقورداعا سىلتەمە جاساپ. 

- پرەزيدەنت مىرزا، رەسمي ساپارمەن كەلۋگە شاقىرعانىڭىز ءۇشىن العىس ايتامىن. استاناعا كەلىپ، سىزبەن جۇزدەسىپ وتىرعانىما قۋانىشتىمىن. وسى ساپاردى ۇيىمداستىرعانىڭىزعا ريزاشىلىعىمدى بىلدىرەمىن. بۇل ساپار ءبىزدىڭ ەكىجاقتى سەرىكتەستىگىمىز ءۇشىن ماڭىزدى جىلمەن تۇسپا-تۇس كەلىپ وتىر. بۇگىن ءبىز وزەكتى حالىقارالىق ماسەلەلەر بويىنشا پىكىر الماسىپ، ب ۇ ۇ جارعىسىن، سونىڭ ىشىندە اۋماقتىق تۇتاستىق، ۇلتتىق تاۋەلسىزدىك قاعيداتتارىن ساقتاۋعا بەيىلدى ەكەنىمىزدى تاعى دا ناقتىلاي الامىز. سونىمەن قاتار ەكىجاقتى ىنتىماقتاستىق ماسەلەلەرىن تالقىلايمىز. ءبىز ەكونوميكالىق تۇرعىدان سەرىكتەس ەلدەرمىز. سونداي-اق قازاقستان مەن فرانسيا اراسىنداعى ەكونوميكالىق- ستراتەگيالىق ارىپتەستىگىمىزدى ودان ءارى دامىتا تۇسەتىن ماڭىزدى كەلىسىمدەرگە قول قويامىز. سىزبەن جۇزدەسىپ، ورتاق كۇن ءتارتىبىن تالقىلاۋ مۇمكىندىگى تۋعانى ءۇشىن قۋانىشتىمىن، - دەدى فرانسيا پرەزيدەنتى.

مەملەكەتتەر باسشىلارى قازاق- فرانسۋز ستراتەگيالىق سەرىكتەستىگىنىڭ قازىرگى جاي-كۇيى مەن دامۋ پەرسپەكتيۆالارىن تالقىلادى.

ساياسي ديالوگتى نىعايتۋعا، ساۋدا-ەكونوميكالىق، ينۆەستيتسيالىق، ەنەرگەتيكالىق، كولىك-لوگيستيكالىق جانە مادەني-گۋمانيتارلىق سالالارداعى ىنتىماقتاستىقتى كەڭەيتۋگە ەرەكشە نازار اۋدارىلدى.

قاسىم-جومارت توقايەۆ پەن ەممانيۋەل ماكرون حالىقارالىق جانە وڭىرلىك كۇن تارتىبىندەگى وزەكتى ماسەلەلەر جونىندە پىكىر الماستى.