بۇكىل بورتتى امان الىپ قالعان. ۇتقىر شەشىمىمەن تاريحتا قالعان ۇشقىشتار
استانا. قازاقپارات - اقتاۋ ماڭىندا قۇلاعان ۇشاق پيلوتىنىڭ ارەكەتى جەلىدە قىزۋ تالقىلانىپ جاتىر. كوپشىلىك ۇشقىشتىڭ بىرنەشە ساعات بويى قاۋىپسىز جەرگە قونۋعا تىرىسقانىن جانە اۋەدە ءتۇرلى مارشرۋت جاساپ بارىنشا بورت مۇشەلەرىن امان الىپ قالۋعا نيەتتەنگەنىن بولجاپ وتىر.
تاريحتا وسىعان ۇقساس توتەنشە جاعدايدا ەرلىك كورسەتىپ، ۇشاقتاعىلاردىڭ ءومىرىن ساقتاپ قالعان قانداي پيلوتتار بار؟
اپاتتى ۇشاقتى سۋعا قوندىرعان ساللەنبەرگەر
2009-جىلدىڭ 15-قاڭتارىندا الەم اۆياتسيا تاريحىنداعى ەڭ ەرەكشە وقيعالاردىڭ ءبىرى بولدى. "US Airways" كومپانياسىنىڭ 1549 رەيسى Airbus A320 ۇشاعىمەن نيۋ-يورك اۋەجايىنان شارلوتتا قالاسىنا ۇشىپ شىقتى. ۇشاق اۋەگە كوتەرىلگەننەن كەيىن بىرنەشە مينۋت ىشىندە قۇستارمەن سوقتىعىسىپ، ەكى قوزعالتقىشى دا ىستەن شىقتى. بۇل جاعداي پيلوت چەسلي "ساللي" ساللەنبەرگەر مەن ونىڭ ەكىنشى پيلوتى دجەففري سكايلزدىڭ باتىل ءارى كاسىبي شەشىمدەرىن تالاپ ەتتى.
چەسلي ساللەنبەرگەر ۇشاقتى جاقىن ماڭداعى اۋەجايلارعا قوندىرۋ مۇمكىندىگىن قاراستىردى. الايدا ۋاقىتتىڭ ازدىعىن جانە قوزعالتقىشتاردىڭ جارامسىزدىعىن ەسكەرە وتىرىپ، ول ۇشاقتى نيۋ-يوركتىڭ ورتاسىنداعى گۋدزون وزەنىنە قوندىرۋ تۋرالى شەشىم قابىلدادى.
ۇشاقتىڭ سۋدىڭ بەتىنە دۇرىس قونۋى ءۇشىن ساللەنبەرگەر ەرەكشە شەبەرلىك كورسەتتى. ول جىلدامدىقتى جانە قونۋ بۇرىشىن ءدال ەسەپتەپ، ۇلكەن جولاۋشىلار ۇشاعىن گۋدزون وزەنىنە جۇمساق ءتۇسىردى. گۋدزون وزەنىندە ورنالاسقان قايىقتار مەن جەرگىلىكتى بيلىك وكىلدەرى تەز ارادا جولاۋشىلاردى ەۆاكۋاتسيالاپ، ولاردىڭ بارلىعىن قاۋىپسىز جەرگە جەتكىزدى. ۇشاق بورتىندا بولعان 155 ادامنىڭ بارلىعى امان قالدى.
كەيىننەن بۇل وقيعا «گۋدزونداعى عاجايىپ» دەپ اتالىپ فيلم رەتىندە تاسپالاندى.
306 ادامنىڭ ءومىرىن امان الىپ قالعان روبەرت پيچ
2001-جىلى Air Transat Airbus A330 ۇشاعى تورونتو- ليسسابون باعىتى بويىنشا TSC236 جوسپارلى رەيسىن ورىندادى. بورتتا 293 جولاۋشى مەن 13 ەكيپاج مۇشەسى بولعان. اتلانت مۇحيتىنىڭ ۇستىنەن كوتەرىلىپ، 5 ساعات 34 مينۋتتان كەيىن كەنەتتەن ونىڭ اۆياكەرونى تاۋسىلىپ، ءبىر قوزعالتقىشى ىستەن شىقتى. كوماندير روبەرت پيچ توتەنشە جاعداي جاريالاپ، باسقارۋ ورتالىعىنا مارشرۋتتان شىعىپ، ازور ارالىنداعى ەڭ جاقىن اۋەجايعا قونۋعا نيەتتى ەكەنىن حابارلادى. الايدا جاعداي ۋشىعىپ 10 مينۋتتان كەيىن ەكىنشى قوزعالتقىش تا ىستەن شىقتى.
پيچ پەن ونىڭ ءبىرىنشى وفيتسەرى ديرك دە دجاگەر 20000 ساعاتتان استام ۇشۋ تاجىريبەسى بار ۇشقىشتار بولدى. قوزعالتقىشتارى جۇمىس ىستەمەي تۇرعاندا، ولار قاجەتتى بيىكتىككە ءتۇسۋ ءۇشىن لاجەس اۆيابازاسىندا بىرنەشە اينالىم جاساپ، ءبىر تولىق شەڭبەر جاساپ، شامامەن 75 ميل اۋەدە ۇشتى. شۇعىل شەشىم قابىلداعان روبەر پيچ ازور ارالدارىنا توتەنشە جاعدايدا قونىپ، بورتتاعى بارلىق 293 جولاۋشى مەن 13 ەكيپاجدىڭ ءومىرىن ساقتاپ قالدى.
جانارمايسىز ۇشقان گيملي گلايدەر وقيعاسى
1983-جىلى 23-شىلدەدە كانادادا مونرەال- وتتاۆا- ەدمونتون باعىتى بويىنشا AC143 جوسپارلى رەيسىن ورىندادى. بورتتا 61 جولاۋشى مەن 8 ەكيپاج مۇشەسى بولعان.
ۇشاق جارتى جولعا جەتىپ، ديسپەتچەردەن 12500 مەتر بيىكتىككە كوتەرىلۋگە رۇقسات سۇرادى. 1983-جىلى مۇنداي بيىكتىككە كوپ ۇشاقتار جەتە المايتىن. وسى كەزدە كابينادا قوزعالتقىشتاردى وتىنمەن قامتاماسىز ەتەتىن جانارماي سورعىلارىنداعى اقاۋلاردى كورسەتەتىن ەسكەرتۋ سيگنالدارى بىرىنەن سوڭ ءبىرى قوسىلا باستادى. ۇشاقتى باسقارعان روبەرت پيرسون مەن ەكىنشى ۇشقىش موريس كۆانتال ۇشاقتىڭ جانارمايى تاۋسىلعانىن ۇقتى. ەكى قوزعالتقىش تا جۇمىسىن توقتاتىپ، ۇشاق تولىقتاي پلانەرگە اينالدى.
كاپيتان روبەرت پيرسون مەن ونىڭ كومەكشىسى شۇعىل تۇردە قونۋعا جارامدى جەر ىزدەۋدى باستادى.
ولار گيمليدەگى مانيتوبا ايماعىندا ورنالاسقان، پايدالانىلمايتىن اسكەري اۋەجايدى تاڭدادى. ول ايماق اۆتوتراسسا رەتىندە قولدىنالاتىن. قوزعالتقىشسىز ۇشقان ۇشاقتى باسقارعان روبەرت پيرسون اەروديناميكالىق قاسيەتتەردى پايدالانىپ، بيىكتىك پەن جىلدامدىقتى ءدال ەسەپتەپ، باياۋ قونۋعا مۇمكىندىك الدى. ناتيجەسىندە ۇشاق گيمليدىڭ ۇشۋ- قونۋ جولاعىنا ءساتتى قوندى. بورتتاعى 69 ادامنىڭ بارلىعى امان قالدى، اۋىر جاراقات العاندار بولمادى.
ت ۋ-124 ۇشاعىنىڭ نيەۆا وزەنىنە قونۋى
1963 -جىلدىڭ 21-تامىزىندا ت ۋ-124 ۇشاعى تالليننەن ماسكەۋگە باعىت العان رەيس كەزىندە لەنينگرادتا (قازىرگى سانكت- پەتەربۋرگ) نيەۆانىڭ بەتىنە اپاتتىق قونۋ جاسادى. ۇشاق اۋەگە كوتەرىلگەننەن كەيىن ونىڭ الدىڭعى ءشاسسيى جابىلماي قالىپ، تەحنيكالىق اقاۋ پايدا بولدى. ۇشاق بىرنەشە ساعات بويى اۋەجايدا شەڭبەر جاساپ ۇشىپ، وتىن تاۋسىلا باستاعان كەزدە، باسقا قونۋ ءادىسىن قاراستىرۋعا تۋرا كەلدى.
كاپيتان ۆيكتور موستوۆوي مەن ەكىنشى پيلوت ۆاسيلي چەرنىشيەۆ ۇشاقتى نيەۆانىڭ بەتىنە قوندىرۋ تۋرالى شەشىم قابىلدادى. ۇشاق وزەننىڭ بەتىنە وتە شەبەرلىكپەن قوندى. ەشبىر ادام اۋىر جاراقات العان جوق. بورتتا بارلىعى 52 ادام بولدى جانە ءبارى امان قالدى. ۇشاق نيەۆانىڭ بەتىنە جاقىن جەردەگى كوپىردىڭ الدىندا توقتادى.
ايتا كەتەيىك، كەشە 25 - جەلتوقسان كۇنى اقتاۋ ماڭىندا باكۋدەن گروزنىيعا ۇشىپ بارا جاتقان ۇشاق اپاتقا ۇشىرادى. بۇل - Azerbaijan Airlines اۋەكومپانياسىنا تيەسىلى ەمبراەر 190 ۇشاعى. الدىن الا اقپارات بويىنشا ۇشاق بورتىندا 67 ادام، ونىڭ ىشىندە 5 ەكيپاج مۇشەسى بولعان.
Massaget.kz
