بەكتەنوۆ ميحايل ميشۋستينمەن ساۋدا-ەكونوميكالىق ىنتىماقتاستىق ماسەلەلەرىن تالقىلادى
اcتانا. KAZINFORM - رەسەي فەدەراتسياسىنا رەسمي ساپارى بارىسىندا پرەمەر-مينيستر ولجاس بەكتەنوۆ پەن رەسەي فەدەراتسياسى ۇكىمەتىنىڭ ءتوراعاسى ميحايل ميشۋستين اراسىندا ەكىجاقتى كەلىسسوزدەر جۇرگىزىلدى.
ەكى مەملەكەت باسشىلارى دەڭگەيىندە قول جەتكىزىلگەن ۋاعدالاستىقتاردى ءىس جۇزىندە جۇزەگە اسىرۋعا، ونىڭ ىشىندە ءوزارا تاۋار اينالىمىن $30 ميللياردقا دەيىن ارتتىرۋعا نازار اۋدارىلدى. كولىك-ترانزيتتىك ىنتىماقتاستىق، اۋىل شارۋاشىلىعى، قورشاعان ورتانى قورعاۋ، ەنەرگەتيكا جانە گاز، عارىش سالالارىنداعى، سونداي-اق مادەني-گۋمانيتارلىق بايلانىستارداعى ءوزارا ءىس-قيمىل ماسەلەلەرى قارالدى.
بىلتىر ەكىجاقتى تاۋار اينالىمى كولەمى شامامەن %3 عا ءوسىپ، $27,8 ميللياردقا جەتتى. بيزنەس سۋبەكتىلەرى 45,4 مىڭعا جۋىق جۇمىس ورنىن اشۋ ارقىلى بىرلەسىپ 171 جوبانى ىسكە اسىرادى.
ەكىجاقتى ىنتىماقتاستىقتىڭ ماڭىزدى باعىتتارىنىڭ ءبىرى - اگروونەركاسىپ كەشەنىندەگى ءوزارا ءىس-قيمىل. وتكەن جىلدىڭ قورىتىندىسىنا سايكەس، ەكىجاقتى نەگىزدەگى ءوزارا شەكتەۋلەردى الىپ تاستاۋ ناتيجەسىندە سالاداعى تاۋار اينالىمى %4,5 عا ءوسىپ، $3,8 ميللياردتى قۇرادى.
كولىك-ترانزيتتىك باعىتتا وتكەن جىلدىڭ قورىتىندىسى بويىنشا «سولتۇستىك - وڭتۇستىك» حالىقارالىق ءدالىزىنىڭ شىعىس تارماعى بويىنشا جۇك اعىنىنىڭ كورسەتكىشتەرى 2,4 ميلليون تونناعا دەيىن ءوستى.
تاراپتار ءوزارا ساۋدانىڭ وڭ ديناميكاسىن ساقتاۋدىڭ ماڭىزدىلىعىن اتاپ ءوتتى. ەكىجاقتى ساۋدا اينالىمىن ارتتىرۋدا جانە ءوزارا ءىس-قيمىلدىڭ كەڭ اۋقىمدى ماسەلەلەرىن شەشۋدە ىنتىماقتاستىق جونىندەگى ۇكىمەتارالىق كوميسسيانىڭ قىزمەتى ەرەكشە ماڭىزعا يە.
كەلىسسوزدەر قورىتىندىسى بويىنشا ءوزارا ءتيىمدى ساۋدا-ەكونوميكالىق ىنتىماقتاستىقتى نىعايتۋ نيەتتەرى راستالدى.
