بەكتەنوۆ ەلدەگى ەڭبەك قاۋىپسىزدىگىن ارتتىرۋ ءۇشىن 3 ناقتى تاپسىرما بەردى
استانا. KAZINFORM - ق ر پرەمەر-ءمينيسترى ولجاس بەكتەنوۆ ۇكىمەت وتىرىسىندا ەلىمىزدەگى ەڭبەك قاۋىپسىزدىگىن ارتتىرۋ ماقساتىندا ناقتى تاپسىرمالار بەردى.
- قولدانىستاعى ادىستەردىڭ تيىمدىلىگى تومەن بولىپ وتىر. قاراپايىم قاۋىپسىزدىك تەحنيكاسىنىڭ تالاپتارى ەسكەرىلمەي جاتادى. ەڭبەكتى قورعاۋ شارالارىن ۇيىمداستىرۋدا ءبىرىڭعاي ءتاسىل، ال اقپاراتتىق جۇيەلەردە ءوزارا بايلانىس جوق. سوندىقتان ءبىر عانا ەڭبەك مينيسترلىگىنىڭ كۇش- جىگەرى از بولادى. بۇل بارلىق مەملەكەتتىك ورگانداردىڭ، اكىمدىكتەر مەن كاسىپورىنداردىڭ بىرلەسىپ اتقاراتىن اۋقىمدى جۇمىسىنا اينالۋعا ءتيىس، - دەدى ۇكىمەت باسشىسى.
سونداي-اق بەكتەنوۆ ەڭبەك سالاسىن سيفرلاندىرۋ بويىنشا جاۋاپتى ۆەدومستۆوعا ناقتى شارالار قابىلداۋدى تاپسىردى.
- ەلىمىزدىڭ قاۋىپتى وندىرىستىك وبەكتىلەرىندەگى جاراقات الۋ جاعدايلارىن انىقتاۋ مەن ەسەپكە الۋ بويىنشا اقپاراتتىق جۇيەلەردى ينتەگراتسيالاۋدى وسى جىلدىڭ 1- قاراشاسىنا دەيىن اياقتاۋدى تاپسىرامىن. سيفرلىق دامۋ مينيسترلىگى مەملەكەتتىك ورگاندارمەن بىرلەسىپ، وسى جىلدىڭ 1- جەلتوقسانىنا دەيىن ەڭبەكتى قورعاۋ سالاسىنداعى ءبىرتۇتاس سيفرلىق ەكوجۇيەنى قۇرۋدى قامتاماسىز ەتسىن، - دەدى پرەمەر- مينيستر.
ودان بولەك ەڭبەك قاۋىپسىزدىگىن ارتتىرۋ شارالارىن كۇشەيتۋ ماقساتىندا مىناداي 3 تاپسىرما بەردى:
ءبىرىنشى، ەڭبەك مينيسترلىگى مۇددەلى مەملەكەتتىك ورگاندارمەن بىرلەسىپ، وسى جىلدىڭ 1- قاراشاسىنا دەيىن جۇمىس بەرۋشىلەردىڭ وندىرىستە جاراقات الۋ فاكتىلەرىن جاسىرۋىن بولدىرماۋ بولىگىندە زاڭنامالىق تۇزەتۋلەر ازىرلەۋى قاجەت.
ەكىنشى، ونەركاسىپ مينيسترلىگى جۇمىس بەرۋشىلەرمەن بىرگە جىل سوڭىنا دەيىن ونەركاسىپ ورىندارى مەن قۇرىلىس سەكتورىندا وندىرىستىك قاۋىپسىزدىكتى جانە ەڭبەكتى قورعاۋعا ارنالعان ارنايى جابدىقتاردى مىندەتتى تۇردە ورناتۋدى قامتاماسىز ەتسىن.
ءۇشىنشى، توتەنشە جاعدايلار مينيسترلىگى وسى جىلدىڭ سوڭىنا دەيىن كاسىپورىندارعا ونەركاسىپتىك قاۋىپسىزدىك نورمالارىنا سايكەستىگى تۇرعىسىنان تەكسەرۋ جۇرگىزسىن، - دەدى ول.
تاپسىرمالاردىڭ ورىندالۋىن باقىلاۋ ەرمەك كوشەربايەۆقا جۇكتەلەدى.
ايتا كەتەيىك، ەلىمىزدە ەڭبەك قاۋىپسىزدىگى ماماندارىن دايارلايتىن وقۋ ورتالىعى اشىلادى.
