بەكتەنوۆ جايلى مەكتەپ قۇرىلىسى تۋرالى: جۇمىس ءتاسىلى وزگەرمەسە، جاۋاپتى تۇلعالارعا قاتاڭ شارالار قولدانىلادى
استانا. KAZINFORM - جايلى مەكتەپتەردىڭ قۇرىلىسى ۇكىمەتتىڭ قاتاڭ باقىلاۋىندا بولادى. بۇل تۋرالى ۇكىمەت وتىرىسىندا پرەمەر-مينيستر ولجاس بەكتەنوۆ ايتتى.
«مەملەكەت باسشىسىنىڭ جاڭا فورماتتاعى مەكتەپتەر سالۋ تۋرالى تاپسىرماسىن ورىنداۋ ءۇشىن ءبىز بار كۇشىمىزدى جۇمىلدىرىپ، تەز قيمىلداۋىمىز كەرەك. وسىعان بايلانىستى اتالعان جۇمىسقا تارتىلعان بارلىق مەملەكەتتىك ورگاننان ناقتى ءىس-قيمىلداردى تالاپ ەتەمىن. ءبىرىنشى، «سامۇرىق-قازىنا» قورىنا 1- قىركۇيەككە دەيىن 98 مەكتەپتىڭ، ال وسى جىلدىڭ سوڭىنا دەيىن قالعان 119 مەكتەپتىڭ پايدالانۋعا بەرىلۋىن قامتاماسىز ەتۋدى تاپسىرامىن. مەرزىمدەردىڭ بۇزىلۋىنا ەشقانداي جول بەرۋگە بولمايدى. بۇل رەتتە، جۇمىستاردىڭ ساپاسى اقساماۋى ءتيىس»، - دەدى ۇكىمەت باسشىسى.
پرەمەر-مينيستر 15- مامىرعا دەيىن بارلىق جوبالاۋ-سمەتالىق قۇجاتتامانى ازىرلەۋدى جانە مەملەكەتتىك ساراپتامادان وتكىزۋدى اياقتاۋ قاجەتتىگىن باسا ايتتى.
«ەكىنشى. ءوڭىر اكىمدەرى 15- ناۋرىزعا دەيىن مەكتەپ قۇرىلىسىنا ارنالعان جەر ۋچاسكەلەرىن راسىمدەۋگە قاتىستى بارلىق پروبلەمانى شەشۋى ءتيىس. بيىل پايدالانۋعا بەرىلەتىن مەكتەپتەرگە باراتىن جولدار مەن ينجەنەرلىك-كوممۋنيكاتسيالىق ينفراقۇرىلىمنىڭ قۇرىلىسىن وسى جىلعى 1- تامىزعا دەيىن اياقتاۋ قاجەت. استانا جانە الماتى اكىمدەرى 15- جەلتوقسانعا دەيىنگى مەرزىمدە ينۆەستورلاردان ساتىپ الىناتىن 9 مەكتەپتى پايدالانۋعا بەرۋدى قامتاماسىز ەتسىن»، - دەدى ولجاس بەكتەنوۆ.
ۇكىمەت باسشىسى ۇشىنشىدەن، وقۋ-اعارتۋ مينيسترلىگى عىلىم جانە جوعارى ءبىلىم مينيسترلىگىمەن بىرلەسىپ، سالىنىپ جاتقان مەكتەپتەردى الدىن الا پەداگوگ كادرلارمەن قامتاماسىز ەتۋ تيىستىگىن ايرىقشا اتاپ ءوتتى.
«وبەكتىلەر اشىلعاننان كەيىن بىردەن ناقتى جوسپارلى وقۋ پروتسەسىن ۇيىمداستىرۋ قاجەت. سيفرلاندىرۋ مينيسترلىگى مەكتەپتەردى ساپالى ينتەرنەتپەن قامتاماسىز ەتسىن. ىشكى ىستەر جانە وقۋ-اعارتۋ مينيسترلىكتەرى جايلى مەكتەپتەردىڭ، ونىڭ ىشىندە ىرگەلەس جاتقان اۋماقتاردىڭ قاۋىپسىزدىگى ماسەلەسىن ەرەكشە باقىلاۋعا الۋى قاجەت. ءبىز ۇلتتىق جوبانى ىسكە اسىرۋ بارىسىن ماۋسىم ايىندا قايتا قارايمىز. ەگەر جۇمىس ءتاسىلى وزگەرمەسە، جاۋاپتى تۇلعالارعا قاتاڭ شارالار قولدانىلاتىن بولادى»، - دەدى ولجاس بەكتەنوۆ.
