بەكەتايەۆ ءىسىنىڭ سوتقا تەز ءتۇسۋى كۇدىكتىلەردىڭ ماتەريالمەن تانىسۋىنا بايلانىستى - انتيكور
استانا. KAZINFORM - سىبايلاس جەمقورلىققا قارسى ءىس-قيمىل اگەنتتىگىنىڭ رەسمي وكىلى دانيار بيگايداروۆ بۇرىنعى ادىلەت ءمينيسترى مارات بەكەتايەۆتىڭ ءىسى بويىنشا تۇسىنىك بەردى.
- قازىرگى تاڭدا قىلمىستىق ءىس بويىنشا تەرگەۋ اياقتالدى، ەندى ءىس ماتەريالدارىمەن تانىسۋ ءجۇرىپ جاتىر. تانىسۋدىڭ قاي ۋاقىتتا اياقتالاتىنى كۇدىكتىلەردىڭ وزدەرىنە بايلانىستى. ءىس ماتەريالدارىمەن تانىسۋ اياقتالعاننان كەيىن ءىس سوتقا جىبەرىلەدى، - دەدى دانيار بيگايداروۆ اگەنتتىكتە وتكەن باسپا ءسوز ءماسليحاتى بارىسىندا.
ايتا كەتسەك، ەكس-مينيستر مارات بەكەتايەۆكە قاتىستى ءىستى تەرگەۋ بىلتىر كۇزدە اياقتالىپ، ماتەريالدارمەن تانىسۋ باستالعان ەدى.
ەسكە سالا كەتەيىك، بۇرىنعى ادىلەت ءمينيسترى 2023-جىلى قازاندا لاۋازىمدىق وكىلەتتىگىن اسىرا پايدالاندى دەگەن كۇدىكپەن ۇستالدى.
انتيكوردىڭ مالىمەتىنشە، ول تالاپ ەتىلمەيتىن قىزمەتتەردى كورسەتۋگە جىل سايىنعى كەلىسىمشارتتار جاساۋ ارقىلى ۇلەستەس كومپانيانىڭ مۇددەسىن قولداعان. ەكس- شەنەۋنىكتى قاماۋدا ۇستاۋ مەرزىمى بىرنەشە رەت ۇزارتىلدى. سوڭعى رەت بيىل 21-مامىردا 2024-جىلعى 21-ماۋسىمعا دەيىن قاماۋ سانكسيالاندى.
