بەكبولات تىلەۋحان تويدا ءان ايتىپ 15 جىلقى، 1 تۇيە جانە 1 كولىك ءمىندى
استانا. قازاقپارات - ەكس- دەپۋتات، ءداستۇرلى ءانشى بەكبولات تىلەۋحان تويلاردىڭ بىرىندە دومبىرامەن ونەر كورسەتىپ، ءبىر ءۇيىر جىلقىعا يە بولدى، دەپ حابارلايدى POLITICO. KZ اقپارات اگەنتتى.
ونەر يەسى مۇحامەدجان تازابەكتىڭ قىزىنىڭ ۇزاتۋ تويىنا ارنايى تۇركيادان كەلدى.
«دومبىرانى حارام دەگەندەر كورسىن. بەكبولات اعامىز دومبىرا ۇستاپ، حالىققا ءان ايتتى. اتاقتى جىراۋ بەكبولات تىلەۋحاندى ساعىنىپ قالعان ەل تويدا قولقا سالىپ، پوپپۋري ايتقىزدى. ونەرىنە ءتانتى بولعان جاندار 15 جىلقى، 1 بوتالى تۇيە، 1 تەمىر تۇلپار اتادى»، - دەپ جازدى ۆيدەو اۆتورى.
«ويان، قازاق» تۋىندىسىنىڭ پروديۋسەرى، جۋرناليست ايساۋلە ءابىلدا ەكس-دەپۋتاتتىڭ ونەرىن حالىق ساعىنعانىن جاسىرمادى.
«اتاقتى جىراۋ، بەلگىلى ءداستۇرلى ءانشى بەكبولات تىلەۋحان اعامىزدىڭ ءانىن تىڭداپ تامسانباعان ادام از شىعار قازاقتا، سەبەبى ول كىسى قولىنا دومبىرا الىپ، ءان سالا باستاعاندا ءبارىمىزدىڭ ۇلتتىق كودىمىزعا سۋ بۇرىككەندەي قومپاڭداپ قالامىز. كەشە توي ۇستىندە ەل قولقا سالىپ، جاندى داۋىسپەن ءار ءوڭىردىڭ ءانىن قۇيقىلجىتا جونەلگەندە اعالار مارتتىگىن كورسەتىپ، سىي- سىياپاتىن ايامادى. تاۋەلسىزدىكتى ەندى الىپ، ەل ەسەڭگىرەپ جاتقاندا قازاقتى قازتۋعاننىڭ، دوسپامبەتتىڭ، اقتامبەردىنىڭ جىرىمەن تابىستىرعان اردا اعا، امان بولىڭىز، بار بولىڭىز!»، - دەدى پروديۋسەر ايساۋلە ءابىلدا.
