ەڭبەك قاۋىپسىزدىگىن قامتاماسىز ەتۋ جونىندەگى جاڭا تۇجىرىمداما قابىلدانادى

ەڭبەك قاۋىپسىزدىگىن قامتاماسىز ەتۋ جونىندەگى جاڭا تۇجىرىمداما قابىلدانادى. بۇل تۋرالى Jibek Joly تەلەارناسىنىڭ «ۋادە» باعدارلاماسىنا سۇحبات بەرگەن پرەمەر-ءمينيستردىڭ ورىنباسارى تامارا دۇيسەنوۆا ايتتى، دەپ حابارلايدى Kazinform.

«ەڭبەك قاۋىپسىزدىگىن قامتاماسىز ەتۋ جونىندەگى ۇلكەن جول كارتاسى بولعان. وتكەن جىلدان باستاپ جۇمىس بەرۋشىلەرمەن جۇمىس ىستەپ، ەڭبەك قاۋىپسىزدىگىن ساقتاۋ ماسەلەسى جونىندەگى تۇجىرىمدامانى ازىرلەدىك. جەلتوقسان ايىندا قابىلدانادى دەپ كۇتىپ وتىرمىز. ونى جۇمىس بەرۋشىلەرمەن بىرگە قاراستىردىق. ءبىراق، جۇمىس بەرۋشىلەر تاراپىنان ازداعان كەلىسپەۋشىلىك بار. ونىڭ دۇرىس ەمەستىگىن ايتىپ وتىرمىز»، - دەدى ۆيتسە-پرەمەر.

وسى ورايدا تامارا دۇيسەنوۆا جۇمىس بەرۋشىلەردىڭ نەلىكتەن كەلىسپەي وتىرعانىن ءتۇسىندىرىپ ءوتتى.

«قازىرگى تاڭدا جۇمىس ورنىنىڭ قاۋىپتى نە ءقاۋىپسىز ەكەندىگىن انىقتاۋ ءۇشىن اتتەستاتسيا جاسالادى. اتتەستاتسيا قۇنى ورتاشا دەپ ايتۋعا بولادى. بارلىق جۇمىس ورنى ەسەپتەلىپ، ورتاشا باعاسى شىعارىلادى. ءبىز «بۇلاي بولمايدى، قانشا جۇمىس ورنى بولسا، سونىڭ ءبارىن اتتەستاتتايمىز» دەپ وتىرمىز. سوندا مىنا تسەحتارىڭىز اسا قاۋىپتى، مىنا سەحتارىڭىز ورتاشا قاۋىپتى ورىن ەكەن دەپ ايتا الامىز. ونى رەتتەۋ كەرەك… ارينە، جۇمىس بەرۋشىلەرگە قارجىلىق جۇكتەمە بولادى… مەنىڭشە، كەلەسى جىلدان باستاپ وسى تۇجىرىمداماعا وراي ەڭبەك كودەكسىنە تاعى دا وزگەرىستەر ەنگىزىلۋى مۇمكىن»، - دەدى ول.