ەڭبەك مينيسترلىگى سۇرانىسقا يە ماماندىق يەلەرىن اتادى

Фото: gov.kz
Фото: gov.kz

استانا. KAZINFORM - ەڭبەك رەسۋرستارىن دامىتۋ ورتالىعىنىڭ پرەزيدەنتى داۋلەت ارعاندىقوۆ ەلەكترو ەڭبەك بيرجاسىن تانىستىرۋعا ارنالعان كەزدەسۋدە نارىقتا تاپشى ماماندىق يەلەرىن اتادى.

«ساۋدا، ريتەيل سياقتى سپەتسيفيكالىق سالالار بار. بۇل سەكتورلاردا ماماندار اعىنى جوعارى. سۇرانىسقا يە ماماندىق دەگەندە جەرگىلىكتى ەرەكشەلىكتەر دە بار. الماتى مەن استانادا قىزمەت كورسەتۋ سالاسىنا مامان تاپشى دەگەن سياقتى. ونەركاسىبى دامىعان قالالاردا ءوندىرىس سەكتورىنىڭ ماماندارى سۇرانىسقا كوبىرەك يە. بىزدە ادەتتە مەديتسينا، ءبىلىم سالاسىنىڭ قىزمەتكەرلەرىنە سۇرانىس جوعارى. سونداي-اق، ءبىز ورتا مەرزىمگە بولجامدار جاسايمىز. ياعني، قانداي سەكتورلار دامىپ كەلە جاتقانىن، قانداي تەحنولوگيالار العا وزعانىن قاراپ وتىرامىز. قازىر IT- ماماندارعا سۇرانىس ۇلكەن. سونداي-اق، باعدارلاما ازىرلەۋشىلەر تاپشى»، - دەگەن ورتالىق باسشىسى جىل سايىن «ەڭبەك نارىعىنا شولۋ» جاريالاناتىنىن ەسكە سالدى.

ايتۋىنشا، بولاشاق ستۋدەنت نەمەسە ونىڭ اتا-اناسى سول شولۋعا قاراپ ماماندىق تاڭداۋىنا بولادى.

«بۇرىن ساۋدا سالاسىندا وففلاين ساتۋشىلار تاپشى بولسا، قازىر لوگيستيكاعا جاۋاپتى ماماندار، كەرى بايلانىس ماماندارى، كۋرەرلەر سۇرانىسقا يە»، - دەدى داۋلەت ارعاندىقوۆ.

سوڭعى جاڭالىقتار