«Birge» سايتى: استانا تۇرعىندارىنان قانداي ۇسىنىستار ءتۇسىپ جاتىر
بۇل تۋرالى ەلوردا اكىمى التاي كولگىنوۆ ءمالىم ەتتى، دەپ حابارلايدى قازاقپارات.
قالا باسشىسى ءتۇرلى باعىتتار بويىنشا كەلىپ تۇسكەن 130 ۇسىنىستىڭ كەيبىرىنە توقتالىپ ءوتتى. «مىسالى، ءبىلىم بەرۋ سالاسى بويىنشا ستۋدەنتتەر قوعامدىق كولىكتە تولەم جاساي الاتىنداي ءبىرىڭعاي ستۋدەنتتىك كارتا جاساۋ ۇسىنىلدى. كارتاعا ستۋدەنتتەردىڭ شاكىرتاقىسى، ۋنيۆەرسيتەتكە كىرىپ- شىعۋ دا بايلانىستىرىلادى. سونداي-اق، ونى قالا مەكەمەلەرىندە جەڭىلدىك تالونى رەتىندە پايدالانۋعا بولادى. قىزمەتى وسىعان ۇقساس كارتانى بۇعان دەيىن مەكتەپتەردە ىسكە قوسقان ەدىك» ، - دەپ جازدى ا. كولگىنوۆ Instagram-دا.
استانانىڭ تاعى ءبىر تۇرعىنى بەيبىتشىلىك جانە كەلىسىم سارايى (پيراميدا) اۋدانىندا شولۋ الاڭىن قۇرۋدى ۇسىنعان. اكىمنىڭ ايتۋىنشا، بۇل اۋماقتا بيىل قوعامدىق كەڭىستىكتى كەڭەيتۋ جانە اباتتاندىرۋ ارقىلى اۋقىمدى كوگالداندىرۋ جۇمىستارى جالعاستىرىلادى.
«سونداي- اق جاياۋ جۇرگىنشىلەر وتكەلىنە دە بايلانىستى يدەيالار ايتىلدى. تۇندە باعدارشام جارىعىن كۇشەيتۋ ۇسىنىلدى، «كۇشتى جارىق جۇرگىزۋشىگە جاياۋ جۇرگىنشىلەردىڭ بارى تۋرالى سيگنال بەرەدى». بۇل جوبا ءبىز ءۇشىن وتە ماڭىزدى. پيلوتتىق جوبا رەتىندە قابانباي باتىر داڭعىلى مەن اتاسۋ كوشەسىنىڭ قيىلىسىندا جاياۋ جۇرگىنشىلەر وتكەلىن ىسكە قوستىق. تاڭدالعان ورىن قاراڭعىدا ءۇش جارىقديودتى پروەكتوردىڭ ارقاسىندا ەرەكشەلەنەدى. جۇرگىزۋشىلەر مەن جاياۋ جۇرگىنشىلەر كەز كەلگەن اۋا رايىندا جارىقتاندىرىلعان جاياۋ جۇرگىنشىلەر جولاعىن كورە الادى. ەگەر وسى جوبا ءوزىنىڭ پايداسىن كورسەتسە، جول ترافيگى جوعارى باسقا ۋچاسكەلەرگە دە ەنگىزەمىز»، - دەدى قالا باسشىسى.
سونداي-اق ءمالىم ەتىلگەندەي، ەلوردا تۇرعىنىنىڭ بىرىنەن سەنىمسىز تاۋار جەتكىزۋشىلەر مەن قىزمەت ۇسىنۋشىلاردى ىزدەيتىن ءبىرىڭعاي جۇيە جاساۋ بويىنشا ۇسىنىس تۇسكەن. بۇدان بولەك، Astra Bus قوسىمشاسىن 2GIS موبيلدىك قوسىمشاسىمەن ينتەگراتسيالاۋ، جىلى ايالدامالار بازاسىندا شاعىن سۋپەرماركەتتەر اشۋ جانە وزگە دە جوبالار بار.
«وزدەرىڭىز بىلەتىندەي، «Birge « سايتىنىڭ جۇمىسى تۇرعىنداردىڭ قالانى دامىتۋ جونىندەگى ۇسىنىستارى ءبىرىڭعاي بازاعا ءتۇسۋى جانە ەلوردامىزدى بىرلەسىپ دامىتۋىمىز ءۇشىن ىسكە قوسىلدى. پلاتفورما قاراپايىم: ءبىرىنشى - يدەيانى ۇسىنۋ، ەكىنشى - ىرىكتەۋ، ءۇشىنشى - جوبانى جۇزەگە اسىرۋ. قالادا تۇرعىنداردىڭ ەڭ جاقسى ۇسىنىستارىن جۇزەگە اسىرامىز. ەلوردانى «نۇر-سۇلتان - جايلى قالا» ماستەر- جوسپارى اياسىندا دامىتۋدامىز، قالانى شىنىمەن جايلى ەتە الامىز»، - دەپ تۇيىندەدى التاي كولگىنوۆ.
بۇعان دەيىن نۇر-سۇلتان قالاسى اكىمىنىڭ ورىنباسارى باقتيار ماكەن اتالعان سايتتىڭ قالا تۇرعىندارى ءۇشىن تيىمدىلىگى جونىندە ايتىپ بەرگەن ەدى.