Bek Air ۇشاعى اپاتىن تەرگەۋ نەگە 5 جىلعا سوزىلدى؟
استانا. قازاقپارات - باس كولىك پروكۋراتۋراسى 2019-جىلعى Bek Air ۇشاعى اپاتىن تەرگەۋ نەگە 5 جىلعا سوزىلعانىن ءتۇسىندىردى.
بۇل تۋرالى ۆەدومستۆونىڭ 2024-جىلعى جۇمىس قورىتىندىسى بويىنشا القا وتىرىسىندا ايتىلدى.
باس كولىك پروكۋراتۋراسىنىڭ مالىمەتىنشە، رەسپۋبليكانىڭ كولىك ينفراقۇرىلىمىنىڭ ءبىر پروبلەماسى - بىلىكتى مامانداردىڭ تاپشىلىعى.
«مىسالى، كولىك مينيسترلىگىنىڭ اۆياتسيالىق وقيعالاردى تەرگەۋ باسقارماسى قىزمەتكەرلەرىنىڭ كاسىبي دەڭگەيىنىڭ السىزدىگىنە بايلانىستى 2019-جىلى Bek Air اۋە كومپانياسىنىڭ ۇشاعىنىڭ اپاتقا ۇشىراۋىن تەرگەۋ 5 جىلدان استام ۋاقىتقا سوزىلدى. تەرگەۋ باسقارماسىنداعى 6 تەرگەۋشىنىڭ بىرەۋى عانا جەتكىلىكتى تاجىريبەگە يە بولدى. بىلىكتى كادرلاردىڭ تاپشىلىعىن قازاقستاننىڭ اۆياتسيالىق اكىمشىلىگى دە باستان وتكەرگەن. پروكۋراتۋرانىڭ ءبىرقاتار ۇسىنۋلارىنان كەيىن كولىك مينيسترلىگى 2024-جىلى ءوز قىزمەتكەرلەرى ءۇشىن بىلىكتىلىكتى ارتتىرۋ جانە تاعىلىمداما كۋرستارىن شەتەلدە دە ۇيىمداستىردى، تەرگەۋشىلەر شتاتىن قۇرۋعا كادرلىق ءتاسىل قايتا قارالدى. بۇل بەلگىلى ءبىر دارەجەدە اقتاۋ قالاسى ماڭىنداعى ازەربايجان اۋە كومپانياسىنىڭ سوڭعى اپاتىن تەرگەۋدىڭ ساپاسى مەن دەڭگەيىنە وڭ اسەرىن تيگىزدى»، - دەلىنگەن حابارلامادا.
ۆەدومستۆو Bek Air اۋە كەمەسىنىڭ اپاتقا ۇشىراعانى تۋرالى سوتقا دەيىنگى ءىس جۇرگىزۋ اياقتالدى، ءىس ماتەريالدارىمەن قىلمىستىق پروتسەسكە قاتىسۋشىلار تانىسىپ جاتقانىن مالىمدەدى.
ەسكە سالايىق، Bek Air ۇشاعىنىڭ اۋە اپاتى 2019-جىلدىڭ 27-جەلتوقسانىندا بولعان ەدى. ۇشاق الماتىدان استاناعا (ول كەزدە نۇر-سۇلتان) باعىت العان بولاتىن، ءبىراق ۇشقاننان كەيىن بىردەن بيىكتىگىن جوعالتىپ، قورشاۋدى بۇزىپ، اۋەجاي ماڭىنداعى ەكى قاباتتى كوتتەدجگە سوعىلدى. ۇشاق بورتىندا 93 جولاۋشى جانە بەس ەكيپاج مۇشەسى بولعان. اپات سالدارىنان 12 ادام قازا تاپتى.
ال 2024-جىلعى جەلتوقساندا Bek Air ۇشاعىنىڭ اپاتىنا قاتىستى تەرگەۋ قايتادان جۇرگىزىلۋى مۇمكىن ەكەنى ايتىلعان ەدى.
