بۇدان بىلاي بالانىڭ قاي مەكتەپ نە كوللەدجدە وقيتىنىن Egov-تان بىلۋگە بولادى

ق ر وقۋ-اعارتۋ مينيسترلىگى تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىمەن، ا. بايتۇرسىن ۇلى اتىنداعى «تالداۋ» ءبىلىمدى زەرتتەۋ مەن باعالاۋدىڭ ۇلتتىق ورتالىعىمەن جانە «ۇلتتىق اقپاراتتار تەحنولوگياسى» ا ق- مەن بىرلەسىپ Egov Mobile موبيلدى قوسىمشاسىندا «ءبىلىم تۋرالى مالىمەتتەر» جاڭا سيفرلىق قۇجاتتى ىسكە قوستى، دەپ حابارلايدى Kazinform.

بۇل قىزمەتتى سمارتفونىڭىزداعى Egov Mobile ەلەكتروندى ۇكىمەت قوسىمشاسى ارقىلى ەلەكتروندى تۇردە پايدالانۋعا بولادى.

بارلىق اقپارات Egov Mobile قوسىمشاسىنداعى سيفرلىق قۇجاتتاردا «وتباسى» بولىمىندە قولجەتىمدى.

مۇندا بالاباقشاعا باراتىنىن، مەكتەپتە، كوللەدجدە وقيتىنىن راستايتىن ءبىلىم تۋرالى مالىمەت بەرىلگەن.

«ءبىلىم تۋرالى اقپاراتتا تولىق اتى-ءجونى، جسن، تۋعان كۇنى، ءبىلىم بەرۋ ۇيىمىنىڭ دەرەكتەرى، جاس توبى، بالاباقشا ءۇشىن توپ اتاۋى، مەكتەپ ءۇشىن سىنىبى مەن ليتەرى جانە كوللەدج ءۇشىن توپ كودى كورسەتىلەدى. ەندى اتا-انالارعا وقۋ ورنىنان قاعاز تۇرىندەگى انىقتاما الۋدىڭ قاجەتى جوق، جەكە كۋالىك سەكىلدى Egov Mobile موبيلدى قوسىمشاسىنان مالىمەتتەردى ۇسىنۋى جەتكىلىكتى»، - دەپ اتاپ ءوتتى وقۋ-اعارتۋ ۆيتسە-ءمينيسترى ايبات ءىلياسوۆ.

ەندى وقۋ ورىندارىنان قاعاز تۇرىندە انىقتامالار الۋ جانە تالاپ ەتۋ الىنىپ تاستالادى. بۇدان باسقا بالانىڭ ءبىلىمى تۋرالى سيفرلىق قۇجاتتار اتا-انالار ءۇشىن كولىكتە ءجۇرۋ كارتاسىن الۋدا جانە باسقا دا قىزمەتتەرگە جۇگىنۋدە قاجەت بولۋى مۇمكىن.

ەسكە سالا كەتەيىك، وقۋ-اعارتۋ مينيسترلىگى بۇعان دەيىن تەحنيكالىق جانە كاسىبي ءبىلىم ديپلومدارىن سيفرلىق نۇسقادا بەرۋ بويىنشا جۇمىس جۇرگىزگەن ەدى.

بۇل قۇجاتتار دا Egov Mobile موبيلدى قوسىمشاسىندا قولجەتىمدى.