بۇدان 150 ميلليون جىل بۇرىن تىرشىلىك ەتكەن تەڭىز قۇبىجىعىنىڭ باسسۇيەگى تابىلدى
انگليانىڭ دورسەت گرافتىعىندا يۋرا جاعالاۋى دەپ اتالاتىن جارتاستاردان تەڭىز قۇبىجىعىنىڭ الىپ باسسۇيەگى الىندى. Kazinform بۇل جايىندا BBC-گە سىلتەمە جاساپ حابارلايدى.
ولشەمى وتە ۇلكەن جانە قورقىنىشتى بولعانىنا قاراماستان، بۇل قۇبىجىق - ميف كەيىپكەرى ەمەس.
تابىلعان باسسۇيەك 150 ميلليون جىل بۇرىن تىرشىلىك ەتكەن ەڭ ءىرى تەڭىز جىرتقىشى پليوزاۆرعا تيەسىلى.
باسسۇيەكتىڭ ۇزىندىعى - ەكى مەتر، جويىلىپ كەتكەن باۋىرىمەن جورعالاۋشىلاردىڭ ەڭ جاقسى ساقتالعان ۇلگىلەرىنىڭ ءبىرى.
ناتيجەسىندە عالىمدار وسى ەجەلگى جىرتقىش تۋرالى جاڭا دەرەكتەرگە قول جەتكىزدى.
دورسەت پالەونتولوگى ستيۆ ەتچەس بۇنى الەمنىڭ ەشبىر جەرىندە كەزدەسپەيتىن بىرەگەي ۇلگى سانايدى.
«بۇل - مەن جۇمىس ىستەگەن ەڭ جاقسى قازبالاردىڭ ءبىرى. ونىڭ بىرەگەيلىگى - تولىعىمەن ساقتالىپ قالعان ۇلگى ەكەندىگىندە»، - دەدى ول BBC-گە.
جاعىنىڭ تومەنگى بولىگى رەپتيليا تىرشىلىك ەتكەن كەزدەگىدەي باسسۇيەكتىڭ قالعان بولىگىمەن بايلانىسىپ تۇر.
«الەم بويىنشا بولشەكتەرى وتە جاقسى ساقتالعان مۇنداي ۇلگىلەردى ەشكىم تاپقان جوق. تابىلسا دا، قانداي دا ءبىر بولىگى جوق بولىپ شىعاتىن. ال مۇندا باسسۇيەكتىڭ ءپىشىنى ءبىرشاما بۇزىلعانىمەن، بۇكىل جەكە سۇيەكتەرى بار»، - دەدى عالىم.
باسسۇيەكتىڭ ۇزىندىعى كوپ ادامداردىڭ بويىنان اسىپ تۇسەدى، بۇل - باۋىرىمەن جورعالاۋشىنىڭ ءتىرى كەزىندە قانشالىقتى الىپ بولعانىن تانىتىپ تۇر.
