بۇعان دەيىنگى وليمپيادا ويىندارىندا قازاقستان تۋىن كىمدەر ۇستاپ شىقتى
استانا. KAZINFORM - بۇگىن پرەزيدەنت XXXIII جازعى وليمپيادا ويىندارىنا قاتىساتىن قازاقستان قۇراما كومانداسىنىڭ مۇشەلەرىمەن كەزدەسىپ، پاريج وليمپياداسىنىڭ رەسمي اشىلۋ سالتاناتىندا كوك بايراعىمىزدى كوتەرىپ شىعاتىن بوكسشى اسلانبەك شىمبەرگەنوۆ پەن جەڭىل اتلەت ولگا سافرونوۆاعا كوكبايراعىمىزدى تابىستادى.
وسى ورايدا وسىعان دەيىنگى جازعى وليمپيادا ويىندارىندا قازاقستان تۋىن كىمدەر الىپ شىققانىن تاعى ءبىر مارتە ەسكە ءتۇسىرىپ، قىسقاشا شولۋ جاساعاندى ءجون كوردىك.
قازاقستاننىڭ تاۋەلسىز ەل رەتىندە قاتىسقان العاشقى جازعى وليمپياداسى 1996-جىلى ا ق ش- تىڭ اتلانتا قالاسىندا وتكەن ەدى. وندا جامبىلدىق جاس بوكسشى ەرماحان يبرايموۆ تۋ الىپ شىقتى.
وسى بايراقتى باسەكەدە يبرايموۆ «قولا» جۇلدە جەڭىپ الدى. جالپى ەسەپتە قازاقستان 11 مەدالمەن 197 ەل اراسىندا 24-ورىنعا تۇراقتادى.
4 جىلدان كەيىن اۋستراليانىڭ سيدنەي قالاسىندا وتكەن كەزەكتى وليمپيادادا دا ەرماحان يبرايموۆ تاعى دا ەلىمىزدىڭ بايراعىن جەلبىرەتىپ شىقتى. بۇل جولى داڭقتى بوكسشى ەل قورجىنىنا التىن مەدال سىيلادى. وسىلايشا، يبرايموۆ - قازاقستاندا ەكى وليمپيادادا قازاقستان تۋىن كوتەرىپ شىعىپ، ەكەۋىندە دە جۇلدەمەن ورالعان جالعىز سپورتشى رەتىندە قازاقستان تاريحىندا ەسىمى التىن ارىپتەرمەن جازىلىپ قالدى.
سيدنەيدە قازاقستان وليمپيادا ناتيجەسى بويىنشا 199 مەملەكەت اراسىنان 22-ورىنعا كوتەرىلدى.
2004-جىلعى وليمپيادا ويىندارىندا قازاقستان تۋىن دزيۋدوشى اسحات جىتكەيەۆ الىپ شىققان بولاتىن. اتالعان وليمپيادادا ول 7-ورىن الىپ، جۇلدەگە ىلىگە المادى. جالپى قازاقستاننىڭ ناتيجەسى تومەن بولىپ، 201 ەلدىڭ اراسىندا 40-ورىننان كورىندى. دەگەنمەن، جىتكەيەۆ 2008-جىلى بەيجىڭ وليمپياداسىندا كۇمىس جۇلدەگە قول جەتكىزدى. بۇل - قازاقستاننىڭ دزيۋدو باعىتىنداعى العاشقى وليمپيادا مەدالى بولدى.
2008-جىلعى بەيجىڭ وليمپياداسىندا قازاقستان تۋىن الىپ شىعۋ مارتەبەسى اۋىر اتلەتيكادان ازيا چەمپيونى باقىت احمەتوۆكە بەرىلدى. باقىت احمەتوۆ سيدنەي وليمپياداسىندا 15-ورىن، افينا وليمپياداسىندا - 7-ورىن العان ەدى. بەيجىڭ ويىندارىندا 415 كەلى ناتيجەمەن 5-ورىن الدى.
2012-جىلى لوندوندا وتكەن وليمپيادا ويىندارىندا ەلىمىزدىڭ كوك بايراعىن گرەك-ريم كۇرەسىنىڭ بالۋانى، ازيانىڭ ەكى دۇركىن چەمپيونى نۇرماحان تىناليەۆ ۇستاپ شىقتى.
الايدا جارىس جولىن 1/8 فينالدان باستاعان ن. تىناليەۆ شۆەتسيالىق ەۋرەن يوحاننان جەڭىلىپ قالدى.
2016-جىلى ريو-دە-جانەيرو قالاسىندا وتكەن جازعى وليمپيادادا قازاقستان تۋىن 20 جاستاعى تاەكۆوندوشى رۋسلان جاپاروۆ الىپ شىقتى. الايدا سپورتشى العاشقى اينالىمدا ازەربايجاندىق قارسىلاسى راديك يسايەۆتان 11:2 ەسەبىمەن جەڭىلدى. جۇبانىش كەزدەسۋىندەگى جەكپە-جەكتە وتانداسىمىز 29 جاستاعى وڭتۇستىككورەيالىق چحا دون ميننەن جەڭىلىپ قالدى.
2020-جىلعى (2021-جىل) توكيو وليمپياداسىندا ەلىمىزدىڭ كوكبايراعىن پرەزيدەنت قاسىم-جومارت توقايەۆ العاش رەت ەكى بىردەي تۋ ۇستاۋشىعا تاپسىردى. اتاپ ايتساق، جەڭىل اتلەتيكادان وليمپيادا چەمپيونى ولگا رىپاكوۆا مەن بوكستان الەم چەمپيوناتىنىڭ كۇمىس جۇلدەگەرى قامشىبەك قوڭقابايەۆقا تابىستاعان بولاتىن.
مىنە، ەندى فرانسيا استاناسى پاريج قالاسىندا وتەتىن XXXIII جازعى وليمپيادا ويىندارىنىڭ سالتاناتتى اشىلۋ راسىمىندە ەلىمىزدىڭ كوك تۋىن تاعى دا ەكى بىردەي سپورتشىمىز الىپ شىعادى. ولار - بوكستان قازاقستان ۇلتتىق قۇراماسىنىڭ كاپيتانى اسلانبەك شىمبەرگەنوۆ پەن جەڭىل اتلەت ولگا سافرونوۆا.
ەستەرىڭىزگە سالا كەتەيىك، قازاقستان سپورتشىلارى بۇگىنگى كۇنگە دەيىن 25 سپورت تۇرىنەن 80 ليسەنزيا جەڭىپ الدى.
ناقتىراق ايتساق، بوكس، دزيۋدو، سپورتتتىق گيمناستيكا، جەڭىل اتلەتيكا، بايداركا مەن كانوەدە ەسۋ، وقپەن اتۋ، سەمسەرلەسۋ، گرەك-ريم كۇرەسى، ەركىن كۇرەس، ساداق اتۋ، ستەندتىك اتۋ، تەننيس، ۆەلوشوسسە، ءجۇزۋ، زاماناۋي بەسسايىس، تاەكۆوندو، ۆەلوترەك، باتۋت گيمناستيكاسى، بادمينتون، اكادەميالىق ەسۋ، كوركەم گيمناستيكا، ترياتلون، ۇستەل تەننيسى، قۇزعا شىعۋ جانە برەيكينگتەن وليمپيادا ويىندارىندا سىنعا تۇسەدى.
فرانسيا استاناسى پاريج قالاسىندا وتەتىن XXXIII جازعى وليمپيادا ويىندارى 26-شىلدە مەن 11-تامىز ارالىعىندا وتەدى. ويىندارعا الەمنىڭ 205 ەلىنەن 10500 سپورتشى قاتىسادى دەپ جوسپارلانعان. وندا 32 سپورت تۇرىنەن 329 مەدال جيىنتىعى ساراپقا سالىنادى.
اۆتور كۇنسۇلتان وتارباي
