بازالىق مولشەرلەمە نە سەبەپتى تومەندەتىلمەدى
استانا. KAZINFORM - بازالىق مولشەرلەمەنى 15,25 پايىز دەڭگەيىندە ساقتاۋ تۋرالى شەشىم قابىلداۋعا ينفلياتسيا اسەر ەتكەن. بۇل جايلى ۇلتتىق بانك باسشىسى تيمۋر سۇلەيمەنوۆ ايتتى.
ونىڭ ايتۋىنشا، بىلتىر جىلدىق ينفلياتسيا 8,6 پايىزعا جەتكەن. وعان قىزمەتتەر مەن ازىق-تۇلىككە جاتپايتىن تاۋارلار كوپتەپ ۇلەس قوسقان. ازىق-تۇلىك ينفلياتسياسى ءبىر جىلدا تۇراقتى بولعانىمەن، سوڭعى ەكى ايدا ۇدەي باستاعان.
— 2024-جىلعى جەلتوقساندا ازىق-تۇلىك تاۋارلارىنىڭ باعاسى 5,5 پايىز ءوستى. ازىق-تۇلىككە جاتپايتىن تاۋارلار باعاسىنىڭ ءوسۋى 8,3 پايىزعا دەيىن جەدەلدەدى. اقىلى قىزمەتتەر ينفلياتسياسى 13,3 پايىز دەڭگەيىندە تۇراقتاندى.
ال رەتتەلەتىن كوممۋنالدىق قىزمەتتەردىڭ باعاسى جىلدىق كورسەتكىشتە 21,1 پايىزعا ءوسىپ، نارىقتىق قىزمەتتەر ينفلياتسياسى 11,5 پايىز بولدى، - دەدى ول.
سونداي-اق، ۇ ب باسشىسى وتكەن جىلعى جەلتوقساندا ايلىق ينفلياتسيا 0,9 پايىز بەلگىسىندە تۇراقتانىپ، ورتاشا تاريحي كورسەتكىشتەردەن جوعارى قالىپتاسقانىن اتاپ ءوتتى.
— بازالىق جانە ماۋسىمدىق فاكتورلاردان تازارتىلعان ينفلياتسيانىڭ كورسەتكىشتەرى دە جەدەلدەپ، شىلدەدەگى ەڭ جوعارى ماندەرگە جەتتى. جاز كەزىندەگى كورسەتكىشكە قاراعاندا قازىرگى ءوسىم سەرۆيستىك كومپونەنتپەن قاتار ازىق-تۇلىك تاۋارلارى مەن ازىق-تۇلىككە جاتپايتىن تاۋارلار باعاسىنىڭ تەز وسۋىنە بايلانىستى. كومپونەنتتەر بولىگىندە ىشكى سۇرانىستىڭ ۇسىنىس مۇمكىندىگىنەن دە اسىپ تۇسۋىنە قاراي ينفلياتسيالىق قىسىم ارتىپ كەلەدى، - دەدى تيمۋر مۇرات ۇلى.
سونداي-اق ول حالىق پەن ساراپشىلاردىڭ ينفلياتسياعا بولجامى دا وسى ۇستانىمنىڭ دۇرىستىعىن كورسەتەتىنىن اتاپ ءوتتى.
— تەڭگە باعامىنىڭ السىرەۋى اياسىندا حالىقتىڭ ينفلياتسيالىق كۇتۋلەرى جەلتوقساندا 14,6 پايىزعا دەيىن كوتەرىلدى. قارجى نارىعىنىڭ كاسىبي قاتىسۋشىلارى ءوز باعالاۋلارىندا ۇستامدىلىقتى ساقتايدى. سوڭعى ساۋالناماعا سايكەس نارىق قاتىسۋشىلارى ينفلياتسيانى 2025-جىلدىڭ سوڭىنا قاراي 7,5 پايىز دەڭگەيىندە بولجايدى. بۇل الدىڭعى باعالاۋدان 6,9 پايىز جوعارى. ساراپشىلار مەن حالىقتىڭ پەسسيميستىك باعالاۋى جانە ينفلياتسيانىڭ تۇراقسىز باياۋ قارقىنى ورتامەرزىمدى كەلەشەكتە ۇستامدى قاتاڭ اقشا-كرەديت شارتتارىن ودان ءارى ۇستاپ تۇرۋ قاجەت ەكەنىن كورسەتەدى، - دەپ ءتۇيدى ءسوزىن ۇ ب باسشىسى.
ايتا كەتەيىك، بۇعان دەيىن ۇلتتىق بانك جاڭا بازالىق مولشەرمەلەنى بەلگىلەگەنىن جازعان ەدىك.
