باۋىرلاس ەلدەر قازاقستانعا قانداي كومەك كورسەتتى
استانا. KAZINFORM - دوستىق، تۋىستىق سىن ساعاتتا سىنالادى. ەلدەگى توتەنشە جاعداي كەزەڭىندە كورشى ەلدەر د كەندە قالماي، قول ۇشىن سوزدى. قىرعىزستان، تۇركيا، رەسەي، وزبەكستان مەن تاجىكستانان كەلگەن كومەك كەرۋەنى اراداعى قارىم- قاتىناستىڭ دوستىق ءارى سەنىمدى سەرىكتەستىك پەيىلدە قۇرىلعانىن تاعى ءبىر دالەلدەدى.
بۇل تۋرالى Jibek Joly تەلەارناسىندا «ءبىز بىرگەمىز» تەلەمارافونىندا ايتىلدى.
قازاقستاننىڭ ءبىرقاتار ءوڭىرىن سۋ باسقاندا قىرعىز اعايىن العاشقىلاردىڭ ءبىرى بولىپ كومەك كورسەتۋگە اسىقتى. ولار 300 توننا ازىق- تۇلىك پەن وزگە دە قاجەتتى زاتتار تيەلگەن 15 جۇك كولىگىن جىبەردى. گۋمانيتارلىق كومەك سۋ باسقان اقتوبە، اتىراۋ، بقو جانە قوستاناي وبلىستارىنا جەتكىزىلدى.
«مۇنى ءبىرتۋعاندىق جاردەم دەپ ايتۋعا بولادى. بۇل جاردەم تۋرالى ءبىزدىڭ ەلشىلىك باستاما كوتەرىپ، جاعدايدى ۇلكەن الاڭمەن باقىلاپ وتىردىق جانە بىشكەككە حابار بەرىپ وتىردىق. گۋمانيتارلىق كومەك جىبەرۋ تۋرالى شەشىمدى پرەزيدەنتىمىز سادىر جاپاروۆ قابىلدادى. از عانا ۋاقىتتا جىلۋ جينالىپ، ەكى لەك كومەك قازاقستانعا جىبەرىلدى. اسىرەسە تاسقىن سۋدان كوبىرەك زارداپ شەككەن اقتوبە، اتىراۋ وبلىستارىن تاڭدادىق»، - دەدى قىرعىزستاننىڭ قازاقستانداعى توتەنشە جانە وكىلەتتى ەلشىسى داستان ديۋشەكەيەۆ تەلەارناعا بەرگەن سۇحباتىندا.
تاجىكستاننىڭ دۋشانبە مەن حۋدجاند قالالارىنان 61 ۆاگون مەن 13 جۇك ماشيناسى جىبەرىلدى. مۇندا 3500 توننا گۋمانيتارلىق كومەك قامتىلعان. مۇنىمەن دە شەكتەلمەي، بىرنەشە كۇننەن كەيىن قۇرىلىس ماتەريالدارى مەن كيىم- كەشەككە تولى 16 ۆاگون تاعى كەلدى.
وزبەك ەلى دە ءبىزدى نازاردان تىس قالدىرمادى. جوعارى شىرشىق ەلدىمەكەنى جۇزدەگەن ليتر وسىمدىك مايى مەن توسەك- جابدىق جيىستىردى جانە ارنايى ەسەپشوتقا 2 ميلليون تەڭگە اۋداردى. تۇرمىسقا قاجەت قۇرال- سايماندارى مەن ۇرلەمەلى قايىق، رەزەڭكە ەتىك جانە گيگيەنالىق زاتتار تاعى بار.
ينگۋشەتيا رەسپۋبليكاسى 20 توننا اۋىز سۋ اسارلاتتى. ولار قازاقستان حالقى اسسامبلەياسىنىڭ «جۇرەكتەن جۇرەككە» قايىرىمدىلىق شاراسىنا وسىلاي ۇلەسىن قوستى.
«وڭىردە تىرشىلىك نارىنەن تارشىلىق بولىپ جاتىر دەگەندى ەستىگەن سوڭ، تاۋدىڭ تازا ءمولدىر سۋىن جىبەرەيىك دەگەن ورتاق شەشىمگە كەلدىك. جۇك كولىگىمىز وتكەن سارسەنبى كۇنى شىقتى. جول الىس بولعان سوڭ، ازداپ ۋايىمداعانامىز راس. دەگەنمەن دىتتەگەن جەرگە امان- ەسەن جەتتى»، — دەيدى ق ح ا كاسىپكەرلەر قاۋىمداستىعىنىڭ ۆيتسە- پرەزيدەنتى دجامبۋلات تانگيەۆ.
الىس- جاقىن شەتەلدەگى قانداستاردىڭ اتامەكەنىن سۋ شايعاندا جۇرەگى شايلىققانى انىق. ومبى وبلىسىنداعى قازاقتار «سىن ساعاتتا تاريحي وتانىمىزعا قول ۇشىن سوزۋ پارىزىمىز» دەپ 55 توننا جۇك جونەلتتى. ولار ارنايى ەسەپشوت اشىپ، ەلدىڭ كەرەك-جاراعىنا ءالى دە قارجى جيناپ جاتىر.
«ساۋابى مول ىسكە بىرنەشە رەت قاتىسىپ جاتىرمىن. سەبەبى قازاقستانداعى سۋ تاسقىنىنان كەلگەن شىعىن ۇلكەن. ءبارىمىز اۋىزبىرشىلىك تانىتىپ، قيىن كەزدە كومەكتەسەمىز دەپ شەشتىك، سۋ جانە گۋمانيتارلىق كومەك جەتكىزدىك. قازاقستاندا تۇراتىن تۋىستارمەن، دوستارمەن ۇنەمى بايلانىستامىز. ءبارى ارتتا قالسىن»، - دەيدى ومبى قالاسىنىڭ تۇرعىنى ايدار عۇسمانوۆ.
موڭعولياداعى ورىمدەي جاستار دا ونەگە كورسەتىپ، تيىن-تەبەنىن بۋىپ-ءتۇيىپ، كومەگىن بەردى. سىن ساعاتتا سۇيەۋ بولعان اعايىننىڭ دەمەۋى كوڭىلدەن ەشقاشان وشپەيدى. سۋ باسقان ەلدى مەكەندەرگە جەكەلەگەن شەت ەل ازاماتتارى دا قول ۇشىن سوزدى.
سونداي ازاماتتاردىڭ ءبىرى – ا ق ش- تىڭ وڭتۇستىك لۋيزيانا شتاتىنان كەلگەن مامان دجون فەلل. ول جەرگىلىكتى مۇناي كومپانياسىندا جۇمىس ىستەيدى جانە 60 قا جۋىق ارىپتەسىمەن بىرگە جەرگىلىكتى تۇرعىندارعا كومەك كورسەتىپ، كوپشىلىكتىڭ ورتاسىنان تابىلدى.
«ءبىزدىڭ لۋيزيانا شتاتىندا جىلىنا 3-4 رەت سۋ تاسيدى. سوندىقتان تاسقىنمەن كۇرەستە ءبىراز تاجىريبەم بار. بار بىلەتىنىمدى جايىق جاعاسىن بەكىتۋدە پايدالانىپ جاتىرمىن. اتىراۋ مەنىڭ ەكىنشى ءۇيىم بولىپ كەتتى. وتباسىم دا وسىندا. وسى جەردەگى جۇمىستى اياقتاپ بولعان سوڭ، تۇرعىن جايىمدى قورعاۋعا بارامىن»، - دەدى د. فەلل.
سونداي- اق، داعىستاندىق وماراسحاب احمەدوۆ تا ەلدىڭ ىقىلاسىنا بولەندى. ول تۇنگى ساعات 2 دە دوسىنىڭ قويماسىندا ساقتالعان 50 مىڭ قاپشىقتى جۇك كولىگىنە تيەپ، استراحان اسىپ، اتىراۋعا كەلىپ، تۇرعىندارمەن بىرگە بوگەت جاساۋعا كومەكتەستى.
سپورتشى ابزال اجىعاليەۆ باستاعان ازاماتتار جەرلەستەرىمەن بىرگە سۋ باسقان ايماقتاردعى بەلسىندەلىمەرمەن بىرگە بارىپ، وقيعانىڭ بەل ورتاسىندا ءجۇردى.
العاشقىلاردىڭ ءبىرى بولىپ، ارينە حالىقتىڭ سۇيىكتىسى ديماش تا باردى جانە قارجىلاي كومەك بەردى.
بۇعان دەيىن Kazinform اگەنتتىگى تاسقىننان جاپا شەككەن حالىققا وتاندىق شوۋ- بيزنەس جۇلدىزدارى قانداي كومەك بەرگەنىن جازدى.
ايتا كەتەيىك، پرەزيدەنت قاسىم- جومارت توقايەۆ تابيعي اپاتتا تىلەۋلەستىك تانىتقان باۋىرلاس حالىقتاردىڭ باسشىلارىمەن تەلەفون ارقىلى تىلدەسىپ، العىس بىلدەرگەن بولاتىن.
