بايدەن فەدەرالدى ايىپتار بويىنشا ءولىم جازاسىنا كەسىلگەندەرگە راقىمشىلىق جاسادى

استانا. KAZINFORM - دونالد ترامپ قاڭتاردا پرەزيدەنتتىك قىزمەتىنە كىرىسكەندە بۇل شەشىمىنىڭ كۇشىن جويا المايدى، دەپ حابارلايدى BBC.

پرەزيدەنت بايدەن فەدەرالدى زاڭدار بويىنشا سوتتالىپ، ءولىم جازاسىنا كەسىلگەن قىرىق تۇتقىننىڭ باسىم كوپشىلىگىنىڭ جازاسىن جەڭىلدەتتى.

ولار ەندى ءومىر بويى تۇرمەدە وتىرادى، ءبىراق مەرزىمىنەن بۇرىن بوساتۋ قۇقىعى بەرىلمەيدى. دونالد ترامپ قاڭتار ايىندا قىزمەتىنە كىرىسكەندە بۇل شەشىمنىڭ كۇشىن جويا المايدى.

- مەن قوعامدىق قورعاۋشى، سەناتتىڭ سوت- قۇقىقتىق كوميتەتىنىڭ ءتوراعاسى، ۆيتسە- پرەزيدەنت جانە قازىر پرەزيدەنت رەتىندەگى ار- وجدانىم مەن تاجىريبەمدى ەسەپكە الا وتىرىپ، فەدەرالدى دەڭگەيدە ءولىم جازاسىن قولدانۋدى توقتاتۋىمىز كەرەك ەكەنىنە سەنىمدىمىن، - دەدى بايدەن.

ءولىم جازاسىنا قارسى بولعاندار جاڭادان سايلانعان پرەزيدەنت دونالد ترامپ بۇل جازانى قولدايتىنىن ايتۋدا. ول 45- پرەزيدەنت بولىپ سايلانعان ساتتە شامامەن جيىرما جىلعا جۋىق ۇزىلىستەن كەيىن فەدەرالدى ءولىم جازاسىن قايتا قولدانا باتاعانىن، ەل باسقارىپ تۇرعان كەزدە 6 ايدا 13 ءولىم جازاسى ورىندالعانىن ەسكە سالدى.

بايدەننىڭ راقىمشىلىعىنا ءۇش فەدەرالدى ءولىم جازاسىنا كەسىلگەن سوتتالۋشىلاردان باسقاسىنىڭ ءبارى ىلىكتى. ولاردىڭ اراسىندا 2013 -جىلى بوستون مارافونىندا جارىلىس ۇيىمداستارعان دجوحار تسارنايەۆ، 2015 -جىلى چارلستوندا توعىز قارا ءناسىلدى ازاماتتى اتىپ ولتىرگەن ديلان رۋف جانە 2018 -جىلى پيتتسبۋرگتا سيناگوگاعا شابۋىل جاساپ، 11 تابىنۋشىنى ولتىرگەن روبەرت باۋەرس بار.

ايتا كەتەيىك، بايدەن پرەزيدەنت كەزىندە شتاتتاردا 70 تەن استام ءولىم جازاسىن ورىندالعان.

پرەزيدەنتتەر ادەتتە قىزمەت مەرزىمىنىڭ سوڭىندا كەشىرىم جاسايدى، ال دەموكراتتار بايدەندى مۇمكىندىگى بولعان كەزدە بۇل وكىلەتتىكتەردى كەڭىنەن پايدالانۋعا شاقىردى.

بايدەن ەكى قىلمىستىق ءىس بويىنشا سوتتالعان جانە ۇكىمدى كۇتىپ وتىرعان ۇلى حانتەرگە دە راقىمشىلىق جاساعان بولاتىن.

سونداي- اق، بۇعان دەيىن بايدەننىڭ 39 ادامعا راقىمشىلىق جاساپ، 1500 گە جۋىق سوتتالۋشىنىڭ جازاسىن جەڭىلدەتكەنىن جازعان ەدىك.