بايدەن الدە ترامپ - امەريكالىقتار كىمگە كوبىرەك سەنىم ارتادى

Фото: bbc.com
Фото: bbc.com

استانا. KAZINFORM - ABC News/Ipsos جۇرگىزگەن ساۋالناماعا سايكەس، امەريكالىقتاردىڭ باسىم كوپشىلىگى ا ق ش پرەزيدەنتى دجو بايدەندى تاعى ءبىر پرەزيدەنتتىك مەرزىمگە قالۋى ءۇشىن تىم كارى دەپ سانايدى، دەپ حابارلايدى ABC News.

امەريكالىق ازاماتتاردىڭ 86 پايىزى بىلدىرگەن پىكىر بويىنشا، 81 جاستاعى دجو بايدەن ەكىنشى مەرزىمگە پرەزيدەنت بولۋ ءۇشىن تىم كارى. ساۋالناماعا قاتىسقانداردىڭ 62 پايىزى 77 جاستاعى بۇرىنعى پرەزيدەنت دونالد ترامپقا قاتىستى وسىنداي پىكىر قالدىردى.

ەكى كانديدات جاقتاستارىنىڭ پىكىرلەرى قىزىعۋشىلىق تۋدىرادى: دەموكراتتاردىڭ 73 پايىزى دجو بايدەندى تىم كارى دەپ سانايدى، ءبىراق رەسپۋبليكاشىلداردىڭ 35 پايىزى عانا دونالد ترامپتىڭ ەڭ جوعارى لاۋازىمدى اتقارۋعا جاسى جەتپەيدى دەگەن پىكىر بىلدىرگەن. ال تاۋەلسىز سۇرالعانداردىڭ پىكىرى ەڭ كەسىمدى بولدى: دجو بايدەندى تىم كارى دەپ ەسەپتەيتىن تاۋەلسىز رەسپوندەنتتەر 91 پايىز بولسا، دونالد ترامپقا مۇنداي پىكىر ايتقاندار 71 پايىز بولدى.

جاڭا ساۋالناما ارنايى پروكۋرور روبەرت گۋردىڭ وتكەن اپتادا جاريالانعان بايانداماسىنان كەيىن جۇرگىزىلگەن. ر. گۋر ءوز بايانداماسىندا دجو بايدەنگە ونىڭ پسيحيكالىق دەنساۋلىعىنا قاتىستى كۇمانعا بايلانىستى كەڭسەدە بولماعان كەزدە قۇپيا قۇجاتتاردى دۇرىس پايدالانباعانى ءۇشىن ايىپ تاقپاۋىن ۇسىندى.

ۆيتسە-پرەزيدەنت كامالا حارريس باياندامانى «ساياسي استارى بار» دەپ اتادى. ساۋالناماعا سايكەس، امەريكالىقتار دونالد ترامپ (44 پايىز) دجو بايدەنگە قاراعاندا (26 پايىز) يمميگراتسيا مەن مەكسيكا شەكاراسىنداعى جاعدايدى جاقسىراق شەشەتىنىنە سەنىمدى.

امەريكالىق ازاماتتاردىڭ كوبى سونداي-اق دجو بايدەنگە قاراعاندا ەلدەگى قىلمىسپەن كۇرەس (41 پايىز-28 پايىز)، ەكونوميكا (43 پايىز-31 پايىز) جانە ينفلياتسيا (41 پايىز-31 پايىز) ماسەلەلەرىن شەشۋدە دنالد ترامپقا كوبىرەك سەنىم ءبىلدىرىپ وتىر.

باسقا نەگىزگى ماسەلەلەر بويىنشا دجو بايدەن تۇسىك جاساتۋ (37 پايىز-28 پايىز)، دەنساۋلىق ساقتاۋ (38 پايىز-28 پايىز) جانە كليماتتىڭ وزگەرۋى (39 پايىز-22 پايىز) بويىنشا ماسەلەلەردى شەشۋدە دونالد ترامپتان باسىم بولىپ وتىر.

ABC News/Ipsos ساۋالناماسى 9-10- اقپان كۇندەرى اعىلشىن جانە يسپان تىلدەرىندە 528 ا ق ش ەرەسەكتەرىنىڭ كەزدەيسوق ۇلتتىق تاڭداۋى اراسىندا جۇرگىزىلدى.

سوڭعى جاڭالىقتار