بايدەن اكىمشىلىگى ترامپقا TikTok قا تىيىم سالۋ مۇمكىندىگىن بەرەدى
استانا. KAZINFORM - بايدەن اكىمشىلىگى قولدانۋشىلاردى TikTok جەلىسىنەن اجىراتاتىن شارا قولدانۋدى جوسپارلاپ وتىرعان جوق، دەپ جازادى ABC News.
— بۇل ماسەلە بويىنشا ءبىزدىڭ ۇستانىمىمىز انىق: TikTok امەريكانىڭ باقىلاۋىمەن جۇمىسىن جالعاستىرۋى كەرەك. زاڭنىڭ يناۋگۋراتسياعا ءبىر كۇن قالعاندا مەرەكەلىك دەمالىس كۇندەرى كۇشىنە ەنەتىنىن ەسكەرسەك، ونىڭ ورىندالۋى كەلەسى اكىمشىلىككە بايلانىستى بولادى، - دەدى اق ءۇي قىزمەتكەرى.
زاڭعا سايكەس، تيكتوك 19-قاڭتاردا جابىلۋعا مىندەتتى ەمەس. ويتكەنى قولدانبا دۇكەندەرى مەن ينتەرنەت-حوستينگ قىزمەتتەرى زارداپ شەگۋى مۇمكىن. الايدا، Apple ،Google جانە Oracle سياقتى تەحنولوگيالىق كومپانيالار TikTok قىتايلىق «ByteDance» كومپانياسىنا تيەسىلى بولعان كەزدە جاۋاپكەرشىلىككە تارتىلۋى مۇمكىن. زاڭ ادىلەت مينيسترلىگىنە ءبىر پايدالانۋشىعا 5 مىڭ دوللارعا دەيىن ايىپپۇل سالۋ قۇقىعىن بەرەدى. اتالعان قوسىمشانى شامامەن 170 ميلليون امەريكالىق پايدالاناتىنىن ەسكەرسەك، بۇل - وتە ۇلكەن سوما.
زاڭدا پرەزيدەنت ءۇش شارتتى ەسكەرە وتىرىپ، تىيىم سالۋدى ءبىرجولعى مەرزىمگە 90 كۇنگە دەيىن كەيىنگە قالدىرا الادى دەلىنگەن: TikTok ءوزىنىڭ قىتايلىق يەسىنىڭ اكتيۆتەرىن ساتۋدى «جۇزەگە اسىرۋ جولىندا» تۇرعانىن كورسەتۋى كەرەك. ساتۋ ىسىندە «ايتارلىقتاي پروگرەستىڭ دالەلى» بولۋى كەرەك جانە بۇل پروگرەسس ء«تيىستى زاڭدى كۇشى بار كەلىسىمدەرمەن» بەكىتىلۋى كەرەك.
قازىرگى ۋاقىتتا وسى شارتتاردىڭ كەز كەلگەنى ورىندالعانىن كورسەتەتىن بەلگىلەر جوق.
دجو بايدەن جانە كەيبىر كونگرەسس جەتەكشىلەرى Tik Tok-قا قارسى ۋلتيماتۋم ByteDance جانە ونىڭ قىتاي ۇكىمەتىمەن بايلانىسىندا قاۋىپسىزدىك ماسەلەلەرى ءۇشىن قاجەت دەپ مالىمدەدى.
دونالد ترامپ TikTok-قا ءبىرىنشى مەرزىمىندە تىيىم سالۋعا تىرىستى. ءبىراق سودان بەرى 2024-جىلعى پرەزيدەنتتىك ناۋقان كەزىندە قوسىمشانى «قۇتقارۋعا» ۋادە بەرىپ، كوزقاراسىن وزگەرتتى. جەلتوقسان ايىندا وتكەن باسپا ءسوز ءماسليحاتىندا جاڭا سايلانعان پرەزيدەنت جاس سايلاۋشىلاردى تارتۋعا كومەكتەسكەن قوسىمشاعا «جۇرەگىندە جىلى ورىن» بار ەكەنىن ايتتى.
بۇعان دەيىن Tik-Tok باس ديرەكتورى تسزى چۋ شوۋ دۇيسەنبىدە دونالد ترامپتىڭ يناۋگۋراتسياسىنا قاتىسا الادى دەپ حابارلانعان بولاتىن.
ەستەرىڭىزگە سالا كەتەيىك، قىتاي TikTok تى يلون ماسكقا ساتۋ مۇمكىندىگىن قاراستىرىپ جاتىر.
