بايبەككە قاتىستى قىلمىستىق ىستەر جايلى ا ف م ءتوراعاسىنىڭ ورىنباسارىنا سۇراق قويىلدى

استانا. قازاقپارات - الماتىنىڭ بۇرىنعى اكىمى باۋىرجان بايبەككە قاتىستى تەرگەلىپ جاتقان قىلمىستىق ىستەر جايلى قارجىلىق مونيتورينگ اگەنتتىگى ءتوراعاسىنىڭ ورىنباسارى جەڭىس ەلەمەسوۆتەن سۇرالدى، - دەپ حابارلايدى Massaget.kz ءتىلشىسى.

ءماجىلىس كۋلۋارىندا ەلەمەسوۆكە «قوسپايەۆتىڭ قىلمىستىق توبى باۋىرجان بايبەكتىڭ اكەسىنە جىلجىمايتىن مۇلىكتى ارزان باعامەن ساتتى» دەگەن اقپاراتقا بايلانىستى پىكىر ءبىلدىرۋ سۇرالدى.

«ا ف م تاراپىنان بايبەك وتباسى بويىنشا قانداي دا ءبىر قارجىلىق تەرگەۋ جۇرگىزىلىپ جاتىر ما؟» - دەگەن سۇراق قويىلدى.

«بايبەككە قاتىستى، ونىڭ ىشىندە اكەسىنە دە، وزىنە دە قاتىستى تىركەلگەن قىلمىستىق ءىس بىزدە جوق. قوسپايەۆقا كەلسەك - سوت ۇكىمى شىقتى. ءبىرقاتار مۇلىك تاركىلەندى. سونىمەن قاتار كەيبىر تۇلعالارعا قاتىستى ءالى قۇقىقتىق باعا بەرىلەتىن جەكە قىلمىستىق ءىس تە بار»، - دەپ جاۋاپ بەردى جەڭىس ەلەمەسوۆ.

ونىڭ ايتۋىنشا، بۇل تۇلعالاردىڭ قاتارىندا قوسپايەۆتىڭ ۇيىمداسقان قىلمىستىق توبىنا اكتيۆتەردى جاسىرۋعا جانە تىعۋعا كومەكتەسكەن لاۋازىمدى تۇلعالار بار.

بۇعان دەيىن حابارلانعانداي، الماتىنىڭ ەكس-اكىمى باۋىرجان بايبەكتىڭ اكەسىنىڭ ەسىمى ەلدوس قوسپايەۆتىڭ ۇيىمداسقان قىلمىستىق توبىنا قاتىستى سوت قۇجاتتارىندا اتالعان. بۇل - ءساۋىر ايىنىڭ سوڭىندا سوتتالعان ايبەك قوسپايەۆ ىسىندەگى مالىمەتتەردەن بەلگىلى بولعان.

2024-جىلدىڭ قاڭتارىندا استانا قالاسىنىڭ مامانداندىرىلعان اۋدانارالىق قىلمىستىق سوتىندا ەلدوس قوسپايەۆ پەن ونىڭ ۇيىمداسقان قىلمىستىق توبىنا قاتىستى ۇكىم شىعارىلعان. ايىپتالۋشىلار ورىندىعىندا 11 ادام وتىرعان.

ەلدوس قوسپايەۆ 15 جىلعا باس بوستاندىعىنان ايىرىلىپ، مۇلكى (پاتەرلەر، جەر تەلىمدەرى، كولىكتەر جانە كوممەرتسيالىق نىساندار - رەد.) تاركىلەندى. ايدوس قوسپايەۆ 12 جىلعا سوتتالدى. باسقا قاتىسۋشىلار دا 9 جىلدان 12 جىلعا دەيىن باس بوستاندىعىنان ايىرىلدى.