باياناۋىلدا «تەگىڭدى قازاقشالاپ، تەلەفون ۇتىپ ال» ەرەكشە ۇتىسى جاريالاندى
پاۆلودار. KAZINFORM - بايقاۋعا جاسى ون التىدان اسقان، جەكە كۋالىك نەمەسە ءتولقۇجاتتى جاڭادان العان كەز كەلگەن ازامات قاتىسا الادى. جەڭىمپازدار ناۋرىز مەيرامىندا ماراپاتتالادى.
حالىقارالىق «قازاق ءتىلى» قوعامى» قوعامدىق بىرلەستىگىنىڭ باياناۋىل اۋداندىق فيليالى «تەگىڭىزدى قازاقشالاپ، تەلەفون ۇتىڭىز» اتتى ۇتىس ويىنىن جاريالادى.
«ۇتىس ويىنىنىڭ شارتتارى قاراپايىم. اتى-ءجونىڭىز بەن تەگىڭىزدى «حالىققا قىزمەت كورسەتۋ ورتالىعىنا» بارىپ قازاقشالاعان سوڭ 1414 نومىرىنەن كەلگەن حابارلامانى سكرينشوت جاساپ، ەسكى جانە الماستىرىلعان اتى-ءجونىڭىز بەن مەكەنجايىڭىزدى تولىق جازىپ، 87056002260 whatsapp نومىرىنە جولداۋىڭىز قاجەت. اتى-ءجونى بۇرىننان قازاقشا جازىلعان ازاماتتار قاتىسا المايدى. ۇتىس ويىنىنىڭ جەڭىمپازدارى Instagram-داعى @qazaqtili_qogamy_baianauyl پاراقشاسىندا تىكەلەي ەفيردە انىقتالادى»، دەپ حابارلادى بىرلەستىك فيليالىنىڭ ءتوراعاسى مۇسابەك سەيسەنبەك ۇلى.
جۇلدەگە SAMSUNG A34 ماركالى ەكى سمارتفون تىگىلەدى. جەڭىمپاز 19-ناۋرىز كۇنى انىقتالىپ، باياناۋىل اۋىلىندا وتەتىن ناۋرىز مەيرامىنا ارنالعان كونسەرتتىك باعدارلامادا ماراپاتتالادى.
