باياناۋىلدا تاۋعا شىعىپ، تۇسە الماي قالعان ازاماتتار قۇتقارىلدى

پاۆلودار. KAZINFORM - وتكەن دەمالىس كۇندەرى باياناۋىلداعى دەمالىس ايماعىندا قۇتقارۋشىلار 50 جاستاعى جىگىت اعاسىن جانە 1997-جىلعى ەر ازامات پەن 2000-جىلعى قىزدى تاۋدان ءتۇسىرىپ الدى. ولار بيىك تاۋعا وزدىگىنەن ورمەلەپ، تومەنگە تۇسە الماي قالعان.

باياناۋىلدىق قۇتقارۋشىلار 3 تۋريستكە تاۋدان تۇسۋگە كومەكتەستى.

«1997-جىلعى جىگىت پەن 2000-جىلعى قىز بالا تاۋعا كوتەرىلىپ، قاراڭعىعا قالىپ قويعان. وقيعا ورنىنا دەرەۋ 5 قۇتقارۋشى جىبەرىلىپ، 700 مەتر بيىكتىكتەن الپينيستىك جابدىقتىڭ كومەگىمەن دەمالۋشىلار تومەنگە ءتۇسىرىلدى. ولارعا مەديتسينالىق كومەك قاجەت بولمادى. ال ونىڭ الدىندا 1,5 ساعات بۇرىن «اقبەت» تاۋىنا كوتەرىلىپ، وزدىگىنەن تۇسە الماعان 50 جاستاعى ەر ادامعا تاۋدان تۇسۋگە كومەكتەستى»، - دەپ حابارلادى وڭىرلىك توتەنشە جاعدايلار دەپارتامەنتىنىڭ باسپا ءسوز قىزمەتى.

ەسكە سالا كەتەيىك، باياناۋىلدا تۋريستەر سيرەك وسىمدىكتەردى جۇلعانى ءۇشىن دەمالىس ۇيلەرىنىڭ يەلەرىنە ەسكەرتۋ جاسالدى.